Кейінгі кезде интернет-алаяқтар жаңа схемаға көшті. Әсіресе, iPhone қолданушыларына «iCloud бұлттық сервисі толып кетті» деген жалған хабарламалар жиі келіп жатыр. Мұндай ескертулер SMS, электрондық пошта немесе түрлі қосымша арқылы таралады және сырт көзге ресми сервистердің хабарламасынан еш айырмасы жоқтай көрінеді.
Алаяқтар қалай әрекет етеді?
Хабарламаларда пайдаланушы аккаунты бұғатталуы мүмкін екені, ал ондағы фото, видео мен құжаттардың жойылып кету қаупі бар екені айтылады. Бұл – адамды қорқытып, асығыс шешім қабылдатуға бағытталған тәсіл. Көбіне «сақтау көлемін ұлғайту», «төлем деректерін жаңарту» немесе «қолжетімділікті қалпына келтіру» деген сілтемелер ұсынылады.
Фишингтік сайттардың қаупі неде?
Сілтемеге өткен жағдайда пайдаланушы түпнұсқа сайтқа ұқсатып жасалған жалған парақшаға тап болады. Онда енгізілген логин, құпиясөз және банк картасының деректері бірден киберқылмыскерлердің қолына түседі. Осылайша жеке ақпарат толықтай ұрлануы мүмкін.
Қай сервистердің атынан келуі мүмкін?
Мұндай алаяқтық тек iCloud-пен шектелмейді. Осыған ұқсас хабарламалар Google Drive, Mail.ru бұлты, Яндекс Диск сияқты танымал бұлттық сервистердің атынан да жіберілуі мүмкін.
Өзіңізді қалай қорғайсыз?
Мамандар қарапайым қауіпсіздік ережелерін сақтауға кеңес береді. Ең алдымен, SMS немесе пошта арқылы келген «шұғыл» хабарламалардағы сілтемелерге өтпеу керек. Бұлттық сервисіңіздің жағдайын тек ресми қосымша немесе сайт арқылы тексеріңіз. Бөгде парақшаларға логин, құпиясөз және банк деректерін енгізбеңіз. Барлық аккаунттарға екі факторлы қорғаныс қосып, әр сервиске жеке, күрделі пароль қолданған жөн. Егер аккаунтыңыз бұзылды деген күдік болса, бірден құпиясөзді өзгертіп, барлық белсенді сессияларды тоқтатыңыз.
«Телефоныңыз толды» деген хабарлама келсе, оның рас-өтірігін тексеруді ұмытпаңыз.