Жамбыл облысының Сарыкемер ауылында 20 тонналық КамАЗ газ тасығыш көлігі өртенді, деп хабарлайды El.kz ақпарат агенттігі.

Оқиға туралы облыстық ТЖД күштер мен құралдарды жедел басқару орталығына сағат 16:22-де хабарланған.

Жамбыл облысы Байзақ ауданының Сарыкемер ауылындағы «Сұлтан» ЖҚС маңында КамАЗ (20 тонна) газ тасығыш көлігінің өртенгендігі туралы хабарлама келіп түсті. Оқиға орнына департамент бөлімшесінен 33 адам және 9 бірлік техника жөнелтілді. Өрт сөндірушілердің күшімен өрт 20:49-да оқшауланып, 21:34-те жойылды. Оқиға салдарынан зардап шеккендер мен қаза болғандар тіркелмеген. Өрттің шығу себебі мен келтірілген шығыны анықталуда, - делінген мәліметте.

Жамбыл облысы ТЖ департаменті облыс және қала тұрғындарын өрт қауіпсіздігі ережелерін қатаң сақтауға және төтенше жағдайларға жол бермеуге шақырады.