2026 жылы Қазақстанда әлеуметтік төлемдерге бөлінетін қаржы көлемі артады. Бұл туралы Еңбек және халықты әлеуметтік қорғау министрлігі мәлімдеген болатын, деп хабарлайды El.kz интернет порталы.

Министрлік Tengrinews.kz -ке берген жауабында 2026 жылға арналған республикалық бюджеттің жобасында зейнетақылар мен түрлі әлеуметтік жәрдемақыларға 6,8 триллион теңге қарастырылатынын айтты. Бұл 2025 жылмен салыстырғанда 14,4 пайызға немесе 860,5 миллиард теңгеге артық.

Қаржы мынадай бағыттарға бөлінеді:

• Зейнетақы мен жәрдемақы мөлшерін индексациялауға – 622,6 млрд теңге;
• Алушылар санының өсуіне – 237,9 млрд теңге.

2026 жылдың 1 қаңтарынан бастап 2,6 миллион зейнеткер мен 2,3 миллионға жуық жәрдемақы алушының төлемдері 10,5 пайызға өседі.

Индексациялауға жататын төлемдер тізімі:

• Еңбек өтіліне байланысты (солидарлық) және базалық зейнетақылар;
• Мүгедектік және асыраушысынан айырылу бойынша мемлекеттік әлеуметтік жәрдемақылар;
• Бала тууы, 1,5 жасқа дейін күтім, мүгедектігі бар баласы бар ата-аналар мен қамқоршылар, көпбалалы аналар мен отбасыларға арналған жәрдемақылар;
• Арнайы мемлекеттік жәрдемақылар;
• І топ мүгедегіне күтім жасаушы адамдарға төленетін жәрдемақы;
• Зейнеткерлер мен әлеуметтік төлем алушыларды жерлеуге арналған жәрдемақы.

Министрлік бұл қадам халықтың табысын инфляцияға байланысты құнсызданудан қорғауға және әлеуметтік әділеттілікті қамтамасыз етуге бағытталғанын атап өтті.

Бұған дейін зейнетақы 120 пайызға өсетіні туралы жазған едік.