Түркия мен Иран сыртқы істер министрлері Газа мен Сириядағы жағдайды және Стамбулда өтетін "ядролық келіссөздерді" талқылады, деп хабарлайды El.kz интернет порталы.

Анадолының жазуынша, Түркияның сыртқы істер министрі Хакан Фидан мен Иран сыртқы істер министрі Аббас Эракчи телефон арқылы сөйлесіп, Иранның ядролық бағдарламасына қатысты Стамбулда жұма күні өтетін келіссөздерге байланысты мәселелерді қозғаған.

Түркия СІМ-дегі дереккөздердің хабарлауынша, тараптар телефон арқылы сөйлесу барысында Газа секторындағы гуманитарлық ахуал мен Сириядағы соңғы оқиғалар жөнінде пікір алмасты. Сонымен қатар алдағы күндері өтетін «ядролық келіссөздерге» қатысты жайттар да күн тәртібінде болды.

Жексенбі күні Израиль әскері Газаның орталық бөлігіндегі, осыған дейін әскери қақтығыстар болмаған аудандардың тұрғындарына эвакуациялауға үндеу жолдаған еді.