Ауыл шаруашылығы дақылдарына келетін кері әсердің алдың алу үшін ҚР Ауыл шаруашылығы министрлігі мен Түркістан облысы әкімдігі тарапынан келісілген шегірткеге қарсы қосымша химиялық өңдеу жұмыстарының негізгі бөлігі жүргізілді, деп хабарлайды El.kz ақпарат агенттігі өңір әкімдігіне сілтеме жасап.
Қауіп сейіліп, жағдай тұрақтанды. Егістікті шегірткеден қорғау шаралары Түркістан облысының әкімі Дархан Сатыбалдының төрағалығымен өткен апталық аппарат мәжілісінде баяндалды. Облыс әкімі жауапты сала басшыларына бірқатар тапсырма берді. Қауіп толық сейілгенше жұмыстарды тоқтатпауды жүктеді.
Болжам бойынша, өңірде шегірткелердің таралу аумағы 271,5 мың гектарды құрады, іс жүзінде 340 мыңнан астам гектар өңделді. Шегірткенің белсенді өсу кезеңінде жұмысты күшейту үшін қосымша техника тартылды.
Арнайы топ мүшелері зиянкестерден келетін қауіп толық сейілгенше залалсыздандыру шаралары қолға алынған және көршілес мемлекеттермен шекаралас аумақтарда жүргізілген жұмыстарды бақылауда.
Залалсыздандырудың биыл ерте басталуынан ауыл шаруашылығындағы үлкен шығындарға жол берілмеді. Облыста жалпы өңдеу жұмыстары сәуір айының басында басталып, химиялық өңдеу жұмыстарына 100 дана жер үсті техникасы және 6 ұшақ жұмылдырылды. Фитосанитариялық шаралардың жүргізілуіне 40 инспектор, өзге облыстардан 3 маман, болжам орталығынан 79 маман және аудан, қала әкімдіктерінен қосымша 245 анықтаушы қатысты.
Аумақтарды өңдеуге мамандандырылған техника, оның ішінде жер үсті және әуе көлігі жұмылдырылды. Сала мамандарының айтуынша, биыл шегірткенің таралуы ауа райының салқын, жаңбырлы, желді болуына байланысты созылды.
Айта кетейік, еліміз бойынша өңдеу жұмыстарына 2,5 мыңнан астам маман, 400-ден астам техника, 36 жеңіл әуе технкикасы, 36 ұшақ жұмылдырылды. Биыл алғаш рет техника жетуі қиын жерлердегі жұмысты жеңілдету үшін нақты нысандарды өңдеуге дрондар тартылды.