Целиноград тұрғыны бақшада қарасора өсіріп, есірткі дайындаған, – деп хабарлайды El.kz Polisia.kz-ке сілтеме жасап.
14 қыркүйек «Қарасора-2022» республикалық жедел алдын алу іс-шарасы аясында Целиноград ауданының Жаңаесіл ауылында жергілікті тұрғынның бақшасынан 30-ға жуық «сора» өсімдігінің бұталары табылып, тәркіленді. Сонымен қатар, шаруашылық құрылыстардан сұр-жасыл түсті өсімдік тектес затпен толтырылған 20 литрлік ыдыс, сондай-ақ 2 банка және ұқсас затпен 1 пакет анықталып, тәркіленді. Тәркіленген зат марихуана есірткісі болып шықты. Полицейлер анықтағандай, осы жылдың көктемінде 49 жастағы ауыл тұрғыны өз учаскесінде қарасора отырғызған. Ер адам өсірілген бұталарды есірткі жасау үшін шикізат ретінде пайдаланған, ал кейін өзі де тұтынған. Қазіргі уақытта аталған факті бойынша ҚР ҚК 296-бабы 2-бөлігі (Есірткі заттарымен заңсыз айналысу) бойынша сотқа дейінгі тергеу басталды. Сараптама тағайындалды.