Шетелдік компаниялар жолдарды салып шығады, қызмет көрсету нашар, ал шамадан тыс жүк тиелген ауыр көліктер асфальтта еш бақылаусыз жүреді. Олар жолдың быт-шытын шығарды. Сенатор Талғат Жүнісов өзінің депутаттық сауалында еліміздегі жол саласының проблемалары туралы айтты, деп хабарлайды El.kz ақпарат агенттігі.
Сенатордың сөзінше, Ақмола облысының тұрғындары мен мәслихат депутаттары жолдардың жағдайына байланысты бірнеше рет шағым жазған. Депутат жекелеген өңірлерде облыстық маңызы бар сапалы жолдардың үлесі әлі де 60 пайызға жетпейтіні туралы деректер келтірді.
Тағы бір мәселе – жол құрылысының бағасын анықтау. Шетелдік мердігерлер материалдарды төмен бағада ұсынып, конкурстарға жиі қатысады. Осыған байланысты отандық компаниялар келісімшарттан бас тартады немесе баға демпингіне бейімделуге мәжбүр болады. Бұл жолдың сапасы мен жұмыс мерзіміне теріс әсер етеді, - деді ол.
Талғат Жүнісовтің айтуынша, жол қозғалысының қауіпсіздігі көбіне жолдың сапасы мен жабдықталуына, аялдамалар мен жаяу жүргіншілер өткелдерінің болуына, сондай-ақ олардың жарықтандырылуына байланысты.
Республикалық маңызы бар қалалар мен облыс орталықтарынан тыс жердегі жолдардың көптеген учаскесінде жарық жоқ. Бұл тек инфрақұрылымның артта қалғаны ғана емес. Қаржының шын мәніндегі аздығын, электр энергиясы тарифінің өте жоғары екенін нақты айту керек. Бұл белгілі бір дәрежеде мәжбүрлі үнемдеу мен апаттарға және қайғылы жағдайға әкеледі. Жол бойындағы сервистік қызметке немесе оның болмауына байланысты азаматтардан үнемі шағым түсіп тұрады. Осыған байланысты осы мәселелерді кезең-кезеңімен келісе отырып, бірте-бірте шешуге кірісу қажет, - дейді сенатор.
Талғат Жүнісов сонымен қатар ауыр жүк көліктерінің қозғалысын бақылауды күшейту қажеттігін атап өтті. Өйткені олар жүк көліктеріне арналмаған жолдарды бұзып кетеді.
Автожол саласындағы жобаларды іске асыруға отандық компанияларды тарту, жолдардың сапасы мен жан-жағын, әсіресе ауылдық елді мекендер мен қала маңын көркейту, оның ішінде олардың жарықтандырылуын кезең-кезеңімен көбейте беруді, сондай-ақ жол бойындағы сервисті жақсарту жөнінде пәрменді шаралар қабылдауды сұраймыз. Сондай-ақ бақылауды күшейту немесе жолдарда жүктеме ережесін сақтамайтын ауыр жүк машиналарының жүруіне шектеу қою маңызды, - деді сенатор.