Астана қалалық сотының қылмыстық істер жөніндегі сот алқасы Самат Ерғалиевке қатысты қылмыстық істі апелляциялық тәртіппен қарады, деп хабарлайды El.kz ақпарат агенттігі.
Естеріңізде болса, 16 қыркүйекте Астана қаласының қылмыстық істер жөніндегі ауданаралық соты Самат Ерғалиевті үш жыл алты айға бас бостандығынан айыру туралы үкім шығарған.
Бірінші сатыдағы сот актісімен келіспей, сотталған мен оның адвокаттары оған шағым келтірді. Алайда алқа соттың сотталушының кінәсін дәлелдеу туралы тұжырымдарымен келісті, өйткені оның кінәсі куәгерлердің, соның ішінде шахматшылар мен жаттықтырушылардың айғақтарымен дәлелденді, - делінген соттың мәліметінде.
Осылайша, алқа жасалған сыбайлас жемқорлық ауыр қылмыстың сипаты мен қоғамдық қауіптілік дәрежесін ескере отырып, жазаның түрі мен мөлшерімен келісті.
Ерғалиев РМҚК басшысы кезінде, яғни 2019 жылғы қарашадан желтоқсанға дейінгі аралықты өзінің лауазымдық өкілеттіктерін пайдалана отырып Әлішер Аймұхамбетовті сурдлимпиадалық спорт түрлерінен аға жаттықтырушы лауазымына тағайындап, оны ХІХ қысқы Сурдлимпиада ойындарына қатысуға іссапарға жібергені, сондай-ақ 111 млн теңгеден астам сомада ақшалай көтермелеу алуға ықпал еткені үшін кінәлі деп танылған.