Қазақстандық синоптиктер 25 тамыз, дүйсенбі күні ауа райының қолайсыз құбылыстары туралы ескерту жасады. «Қазгидрометтің» болжамынша, Ақтөбе және Маңғыстау облыстарында күндіз ауа температурасы +36…+38°С-қа дейін жетеді, деп хабарлайды El.kz интернет порталы. 

Метеорологтардың хабарлауынша, республика аумағында әртүрлі ауа райы құбылыстары күтіледі:

• Батыс пен шығыста – жаңбыр, найзағай, кей жерлерде бұршақ пен қатты жел;
• Жекелеген өңірлерде – шаңды дауыл және қатты екпінді жел;
• Солтүстік-батыс, солтүстік және шығыс аймақтарда – түнгі және таңғы уақыттарда тұман;
• Ал елдің көп бөлігінде батыс антициклонының әсерінен жауын-шашынсыз ауа райы сақталады.

Синоптиктердің дерегінше, Ақтөбе облысында +36°С, ал Маңғыстау облысында +38°С дейін аптап ыстық күтіледі. Мамандар мұндай температура денсаулыққа қауіпті екенін ескертіп, тұрғындарға күннің ыстығында ұзақ жүрмеуге кеңес береді.

Қазгидромет және төтенше жағдай қызметі мамандары аптап ыстық пен қатты жел кезінде келесі сақтық шараларын ұстануға шақырады:

• Күннің ең ыстық уақытында (12:00–17:00) далада ұзақ жүрмеу;
• Көбірек су ішу және жеңіл киім кию;
• Балалар мен қарт адамдардың денсаулығына ерекше көңіл бөлу;
• Көлікті көлеңкеге қою, тікелей күн астында қалдырмау;
• Жел күшейгенде терезелерді жабу, қажетсіз сапарды шегеру.