Шымкенттегі қалалық клиникалық аурухана №1 мамандары бүйрек трансплантациясын сәтті жүзеге асырды, деп хабарлайды El.kz интернет порталы otyrar.kz-ке сілтеме жасап.

Донор болып науқастың туған інісі шықты. Осы қадамның арқасында 36 жастағы Алихан Айдаров жаңа өмірге мүмкіндік алды. Бүгінде екі бауыр да өзін жақсы сезінеді және үйлеріне қайтып үлгерді.

Алихан екі жыл бойы бүйрек жетіспеушілігімен күресіп келді. Күн сайынғы ұзақ гемодиализ, шетелде ем іздеу туралы ойлар, уақыттың жетпеу қаупі — бәрі оның өмірін қиындатты. Бірақ құтқарушысы жанынан табылды. Туған інісі батыл шешім қабылдап, ағасына өзінің бүйрегін сыйлады.

Екі жыл бойы есепте тұрдым. Операция жасалды. Біз осында бір аптадан астам болдық. Құдайға шүкір, қазір өзімді жақсы сезінемін. Креатинин деңгейі төмендеді, бәрі қалыпты, - пациент дейді Алихан Айдаров.

Дәрігерлердің айтуынша, донор да, реципиент те толық тексерістен өтіп, заңды келісім берген. Ота ойдағыдай өтті. Бұрын қан қысымы 200–220-ге жеткен Алиханның жағдайы қазір тұрақталып, 120–130 шамасында.

Операцияға дайындық кезінде науқастың қысымы 200-ден асып кететін. Біз 180 көрсеткішінде бастадық. Қазір 120–130 деңгейінде тұрақтады. Креатинин 140-қа дейін түсті. Жалпы жағдайы жақсы, дейді хирург Ұлжан Мұқанова.

Айта кетейік, Шымкентте бұл – 239-шы сәтті бүйрек трансплантациясы. Әрбір ота – бір адамның құтқарылған өмірі мен жаңа үміті.