Семейде әпкесін өлтірген әйел адам 8 жылға сотталды, деп хабарлайды El.kz ақпарат агенттігі.
Ведомствоның мәліметінше, 2022 жылдың маусымында Алматының 33 жастағы тұрғынына Семейде тұратын әпкесі қоңырау шалып, күн сайын ақша сұраған. Оның кәмелетке толмаған екі баласы бар. Оның үстіне әпкесі достарымен бірнеше күн ішімдік ішкен.
Алматы тұрғыны әпкесінің балаларының тағдырына алаңдап, оларды алып кету үшін екі күнге Семейге баруды ұйғарған. Семейге жеткен ол әпкесі мен достары мас екенін, ал балалар аш жүргенін көрген. Осылайша, ол азық-түлік сатып алып, балаларға кешкі ас дайындай бастаған. Осы кезде әпкесі 14 жастағы үлкен қызын ұра бастаған. Ал оның себебі жуылмаған ыдыс болған. Алматы тұрғыны жиенінің көмек сұрап айқайлағанын естіп, ойланбастан балаға жүгіріп барған. Осы сәтте ол пышақты орнына қоюды ұмытып кеткен. Оқыс қимылдаған кезде ол әпкесін жарақаттаған.
Ол жедел жәрдем шақырып, әпкесіне қолынан келгенше көмек көрсеткен. Бірақ дәрігерлер Семей тұрғыны оқиға орнында қайтыс болғанын анықтады. Сот күдіктіні ҚР Қылмыстық кодексінің 99-бабы бойынша кінәлі деп тауып, 8 жылға бас бостандығынан айырды. Қазір ол Абай облысының әйелдер колониясында жазасын өтеп жатыр. Алматыда оның кәмелетке толмаған үш баласы қалды.
Алматы тұрғыны колонияда кондитерлік цехқа орналасқан. Жалақысынан балаларына үнемі сыйлықтар жіберіп тұрады.
Сотталған М. мекемеге ата-анасы мен балалары одан бас тарта ма деп қорқып келді. Өйткені сіңілісі әпкесін өлтіруі - сирек кездесетін жағдай. Онымен сөйлескен кезде оны мазалаған ойлар туралы білдік. Мекеменің психологтарымен әңгімелесу өз нәтижесін берді. Ол жұмысқа орналасты, - дейді мекеме өкілі Ақмарал Қайранова.