Satbayev University-нің Әскери істер институтында запастағы сержанттар бағдарламасы бойынша білім алған студенттердің әскери ант беру рәсімі өтті, деп хабарлайды El.kz ақпарат агенттігі.
Салтанатты рәсімге оқу орнының оқытушылары, Қарулы күштердің ардагерлері, түлектердің туыстары мен жақындары қатысты.
Іс-шараға қатысқан әкімшілік, әлеуметтік және тәрбие жұмысы жөніндегі проректор Сапар Шалабаев оқиғаның маңыздылығын атап өтті.
Ұлы Отан соғысының даңқты батырлары Сағадат Нұрмағамбетов пен Рақымжан Қошқарбаевтың 100 жылдығына, сондай-ақ Satbayev University-нің 90 жылдығы мен Қаныш Сәтбаевтың 125 жылдығында орай әскери ант қабылдау үлкен мәнге ие. Даңқты ата-бабаларымызды әрдайым есте сақтап, мақтан тұтыңдар. Сендерге әскери істер институтының қабырғасында білім алу бақыты бұйырды. Инженерлер қай уақытта да Қарулы күштер элитасының құрамдас бөлігі болған. Бүгінде олар өздерінің тиімділігімен еліміздің қауіпсіздігін қамтамасыз етуде шешуші рөл атқарып келеді, - деді проректор.
Іс-шара аясында студенттердің туыстары мен университет өкілдері сөз сөйлеп, жастарды дайындық кезеңінің аяқталуымен құттықтады.
Әскери істер институтының оқу бағдарламасы тек теориялық сабақтарды ғана емес, сонымен қатар оқу іс-шараларына, спорттық жарыстарға және мәдени жобаларға белсенді қатысуды да қамтыды. Бұл тәсіл студенттерге қажетті әскери дағдыларды игеруге және көшбасшылық қабілеттерін дамытуға мүмкіндік берді.
Әскери істер институты дәстүрге бай әрі өз түлектерімен мақтана алады. Түлектер арасында генерал дәрежесіне көтерілгендер де бар.
Институт тарихы Ұлы Отан соғысынан бір жыл бұрын, сол кездегі политехникалық институттың әскери кафедрасы ашылған кезден бастау алады. Соғыс жылдарында оқу орнының алты өкілі Кеңес Одағының Батыры атағына ие болды. Соғыстан соң бұл білім ордасында екі мәрте Кеңес Одағының Батыры Талғат Бигелдинов оқыған. Даңқты ұшқыш кейін Қазақ ұлттық техникалық зерттеу университетінің құрметті профессоры болды.
Әскери істер институтын бітіріп шыққан 448 студент еліміз Қарулы күштерінің резервін едәуір нығайтады. Бұдан былай олардың әрқайсысы білікті маман ғана емес, сонымен қатар әртүрлі қызмет жағдайларында бөлімшені тиімді басқара алатын кіші командирлер деуге болады.