Жанармай шығынын азайтқысы келетін жүргізушілер арасында гибридті көліктердің танымалдылығы артып келеді. JustAnswer компаниясының автосарапшысы Крис Пайл GOBankingRates порталына берген сұхбатында 2025 жылы қарастыруға лайық модельдерді атап, иелерін күтіп тұрған жасырын шығындар туралы ескертті, деп хабарлайды El.kz интернет порталы.

Сарапшы таңдаған үздік гибридтер

Пайлдың айтуынша, қазір гибридті көліктердің таңдауы өте кең – қолжетімді седандардан бастап кроссоверлерге дейін. Оның тізіміне Kia Sportage, Hyundai Sonata, Honda Accord, Toyota Corolla, Toyota Camry, Kia Niro, Hyundai Elantra және Toyota Prius енді.

Бұл модельдердің көпшілігінің бағасы 30 мың доллардан (шамамен 16 млн теңге) төмен және өз класында жанармайды ең үнемді тұтынуымен ерекшеленеді.

Гибрид иелерін күтіп тұрған шығындар

Сарапшы көлік бағасымен қатар ұзақ мерзімді шығындарды да ескеру қажет екенін ескертеді. Негізгі тәуекел – аккумуляторды ауыстыру, оның құны 4-10 мың доллар аралығында болуы мүмкін.

Жөндеуге алдын ала ақша жинап жүрген дұрыс. Мысалы, бұрын бензинге жұмсайтын соманы сол мақсатқа сақтауға болады, – дейді Пайл.

Дұрыс таңдау жасау

Сарапшы көлік аларда оның қалған құнын тексеруді ұсынады. Бұл – болашақта көліктің қаншалықты тез арзандайтынын көрсететін көрсеткіш.

Бірінші күні-ақ 20% құнын жоғалтатын көлікті ешкім де алғысы келмейді, – деп атап өтті ол.

Гибридтердің тиімділігі неге төмендейді?

Пайлдың айтуынша, тағы бір ескеретін жайт бар: уақыт өте келе аккумулятордың тозуына байланысты гибридтердің жанармай үнемдеу тиімділігі төмендейді.

Күн сайын батарея әлсірей береді, ал бір кезеңде жанармай шығынын азайтуға мүлде үлес қоспай қалады, – дейді маман.

Соған қарамастан, сарапшы гибридті көліктерді әлі де тиімді таңдау деп есептейді. Олар жанармайға кететін шығынды азайтып, әдеттегі жайлылықты сақтайды.

Өзіңіздің нақты қажеттілігіңізді біліп, шешіміңізге берік болыңыз, – деп түйіндеді Крис Пайл.