Солтүстік Қазақстан облысында қаржы пирамидасы анықталды, деп хабарлайды El.kz Қаржы мониторингі агенттігіне сілтеме жасап.
– ҚР Қаржы мониторингі агенттігінің Солтүстік Қазақстан облысы бойынша департаменті «HERMES LTD» қаржы пирамидасының қызметін ұйымдастыру фактісін анықтады, - делінген ұсынылған мәліметте.
Анықталғандай, 2019-2022 жылдар аралығында халықтың қаражатын тарта отырып «HERMES LTD» жобалары бойынша қаржы пирамидасы құрылған. Қызметі – қатысушыларды басқалардың жарналары есебінен байыту болған.
– Қылмыстық іс бойынша жәбірленуші ретінде үш адам танылды. Олар жалпы сомасы 4 миллион теңгеге жуық шығынға ұшырады. Қазіргі уақытта тергеу амалдары жүргізіліп жатыр, - деді агенттіктен.
Қаржы мониторингі агенттігі қаржы пирамидасына қатысты арыз-шағымды ведомствоның сенім телефонына немесе аумақтық қаржы мониторингі органдарына хабарлауға болатынын айтады.