Әлемдік және дәстүрлі діндер көшбасшыларының VII съезінде Рим папасы Франциск барша делегация өкілдеріне алғыс білдірді, деп хабарлайды El.kz.
Съездің ашылу салтанатында Рим папасы Мемлекет басшысы Қасым-Жомарт Тоқаевқа өз алғысын білдірді.
«Барлығымызды біріктіріп отырған Қазақстандағы съездің маңызы зор. Себебі, әлемдік үлкен мәселелерді талқылауға мүмкіндік артады. Сондай-ақ пандемиядан кейінгі бүгінгі жиын барша азамат үшін керек деп білемін. Бұл шара бейбітшілікке жетелейтін бастама. Әлем халықтарының бірге бейбіт өмір сүруімізге талпындыратын жол», - деді Рим папасы.
Сондай-ақ ол Қазақстанның тарихына шолу жасап өтті.
«Қазақстанның тарихында бәрімізге белгілі Ұлы Жібек жолының іздері әлі де бар. Онда көптеген маңызды бастамалар мен жұмыстар атқарылды. Сонымен қатар көптеген наным-сенімдердің бастауы орын алды. Сондықтан Қазақстан зайырлы, кең-байтақ, дамыған елдердің бірі. Осындай мекенде бейбіт өмір сүру маңызды», - деді Рим папасы.