Жыл сайын Қазақстанда біздің қауіпсіздігімізді қорғайтын маман иелеріне арналған Құтқарушы күні атап өтіледі. Осындай кәсіпқойлардың бірі-Талдықорған қаласы №3 өрт сөндіру бөлімінің өрт сөндіруші-құтқарушысы Ардан Байғожанов. Ол 2008 жылдан бастап өзіне жүктелген жауапкершілікті сезіне отырып, азаматтық қорғау органдарындағы міндеттерін батыл және адал орындап жүр, деп хабарлайды El.kz ақпарат агенттігі.
Өрт сөндіруші-құтқарушы мамандығы тек дене күшін ғана емес, сонымен қатар стресстік жағдайларда тез шешім қабылдау қабілетін де талап етеді. Құтқарушылар өртті сөндіру, адамдарды құтқару және алғашқы медициналық көмек көрсету әдістерін зерттей отырып, дайындықтан өтеді. Олар адамдардың өмірі мен денсаулығы өздерінің әрекеттеріне байланысты болатын қиын жағдайларда жұмыс істеуге үйренеді.
Жетісу облысы ТЖД пультіне Мүшелтой шағын ауданындағы бес қабатты үйде болған өрт туралы хабарлама түскен оқиға осындай батырлық белгісінің бірі ретінде есте қалды. Оқиға орнына келгеннен кейін өрт сөндірушілер бесінші қабаттағы пәтердің жалынға оранғанын және кіреберісті қалың түтін басқанын анықтады.
Ардан және оның командасы бірден тұрғындарды эвакуациялауды бастады. Олар екі кішкентай баласы бар отбасы пәтер ішінде екенін білді. Жалын мен түтін көрінуді қиындатты. Бірақ Ардан жанып жатқан пәтерге кіргенде, уақыт аз екенін түсініп, балаларды бірден іздеуге кірісті.
Оттан қорыққан сәбилердің бірі диванның астына кіріп кетті, бұл жағдайды қиындатты. Түтін басқан пәтерден баланы табу үшін Ардан өзінің қысылтаяң жағдайда әрекет етудегі барлық білімі мен тәжірибесін қолданды. Баланы қысқа уақыт ішінде табу керек болды. Баланы тауып, оның тірі екеніне көз жеткізген Ардан тез арада таза ауаға шығарды.
Өрт сөндіру командасының бірлескен іс-әрекеттерінің арқасында төрт адам, оның ішінде екі бала құтқарылды. Жану өнімдерімен уланған олар кейін ауруханаға жатқызылды.
Өрт сөндіруші-құтқарушылардың жұмысы – бұл қысылтаяң жағдайдағы батырлық қана емес, сонымен қатар қиындықтарға үнемі дайын болу. Олар күн сайын жаттығып, өрт, су тасқыны немесе басқа да төтенше жағдайлар сияқты кез келген жағдайды тиімді шешу үшін жаңашылықтарды үйренеді.
Құтқарушы күні қарсаңында адалдығы мен кәсібилігі біздің әлемді қауіпсіз ететін Ардан сияқты батырларды еске түсірейік. Құтқарушылардың еңбегі бізді басқалардың қауіпсіздігіне қамқорлық жасауға және олардың кәсібінің қаншалықты маңызды, әрі қауіпті екенін түсінуге мүмкіндік береді.