Қазақстанға үшінші елдерден және Еуразиялық экономикалық одақ елдерінен автомобиль, су және теміржол көлігімен бидай импортына 6 ай мерзімге тыйым салуды көздейтін жоба әзірленіп жатыр, деп хабарлайды EL.kz ақпарат агенттігі.
Ауыл шаруашылығы министрлігі «Қазақстан аумағына бидайды автомобиль, су және теміржол көлігімен әкелуге тыйым салуды енгізу туралы» бұйрық жобасын дайындады.
Жоба аясында бидайды темір жол арқылы құс және ұн фабрикаларына тек өндіру және тұтыну үшін әкелуге рұқсат етілмек. Бұл ретте құс және ұн тарту кәсіпорындарына әкелінген бидай ішкі және сыртқы нарықта сатылымға жатпайды. Сонымен қатар, тыйым салу Қазақстан аумағынан тыс жерде басталатын және аяқталатын теміржол транзиттік тасымалы аясында Қазақстанға әкелінетін бидайға қолданылмайды.
Әзірлеушілер ішкі қазақстандық нарықта азық-түлік пен жемдік астықтың жеткілікті қоры бар деп түсіндіреді. Бұл ретте Қазақстан Ресейден қосымша астық алады, бұл ішкі нарықта сұраныстың төмендеуіне және бағаның төмендеуіне әкеліп соғады. Мәселен, ҚТЖ мәліметінше, биыл қаңтар айында Ресей Федерациясынан теміржол арқылы 174 мың тонна бидай импортталған, бұл 2022 жылғы деңгейден (127,8 мың тонна) 35 пайызға артық. Жазғы навигация кезеңінде су көлігімен 29 мың тонна бидай импортталды, бұл ішкі нарықтағы ресейлік бидай көлемін арттырады.
Жоба 2024 жылдың 26 наурызына дейін Ашық НҚА порталында қоғамдық талқылау үшін орналастырылған.