Үндістанның Нойа қаласындағы «Marwah Studios Complex» танымал ойын-сауық индустриясы орталығында режиссері Нұргелді Садығұловтың «Балуан Шолақ» көркем фильмінің кино көрсетілімі өтті, деп хабарлайды El.kz Сыртқы істер министрлігінің баспасөз қызметіне сілтеме жасап.
Іс-шара Қазақстанның Үндістандағы Елшілігі мен «Marwah Studios Complex» компаниясымен бірлесіп, Шәкен Айманов атындағы «Қазақфильм» АҚ қолдауымен ұйымдастырды.
Қазақстан-Үндістан кино және мәдениет форумы 300-ден астам көрерменді жинап, олардың қатарына дипломатиялық корпус өкілдері, Үндістан кинематографиясының өнер қайраткерлері, жас және жаңадан бастаған кинематографистер, сондай-ақ біздің отандастарымыз қатысты.
Іс-шара барысында форум қонақтары арасында Абай Құнанбайұлының хинди тіліне аударылған «Қара сөздер» туындысы, сондай-ақ Қазақстан туралы ақпараттық материалдар таратылды.
Сонымен қатар Телангана штатындағы Хайдарабад қаласында белгілі қазақстандық режиссер Ақан Сатаевтың қазақ халқының жоңғарларға қарсы азаттық соғысы туралы баяндайтын «Жаужүрек мың бала» картинасы көрсетілді.