Астанада 3656 әскери бөлімінде журналистерге арналған пресс-тур өтті, деп хабарлайды El.kz ақпарат агенттігі.
3656 әскери бөлімінде еліміздегі төтенше жағдайға арналған ұшақтар мен тікұшақтар орналасқан.
Бұл ұшақтар мен тікұшақтар еліміздегі су тасқыны кезінде тұрғындарды эвакуациялауға, гуманитарлық көмек жіберуге және медицина қызметкерлері мен төтенше жағдай мамандарын жеткізуде қолданылған.
Су тасқыны кезінде тікұшақтың көмегімен 800 адам құтқарылған.
Тасқын кезінде Батыс Қазақстан, Солтүстік Қазақстан, Атырау, Ақтөбе облыстарындағы тұрғындарды эвакуациялау жұмыстары осы тікұшақтардың көмегімен жасалды. Құтқару жұмыстарына 4 тікұшақ қатысты. Балаларды, қарттарды, жарақат алған азаматтарды тікұшақтардың көмегімен эвакуацияладық, - деді Әлібек Малгаджаров авиация бойынша радиоэлектрондық жабдықтарға қызмет көрсету және регламенттеу тобының аға технигі.
Қызыл судан жапа шеккен тұрғындарға дәрі-дәрмек, жылы киім-кешек және құтқарушыларға қажетті техникалар мен мотопомпалар жеткізілген.
Ұшақтар 20 тоннаға, ал тікұшақтар 10 тоннаға дейін гуманитарлық жүк тасымалдауға қауқарлы.
Тікұшақтар көбінесе барлау жұмыстарын жүргізуге қолданылады.
МИ-171 Е – ұшағы транспорттық тік ұшағы, салмағы 8 тоннаға жетеді. Транспорт ретінде 27 адамды, 4 тоннаға дейін жүкті тасымалдай алады, 12 адамға арналған санитарлық орын бар, - деді тікұшақ бортсерігі Арман Пірімбаев.
Таяу Шығыста жер сілкінісі болған кезде 3656 әскери бөліміндегі ұшақтармен Түркия мен Сирияға гуманитарлық көмек жолданған.
Орман өрті кезінде де тікұшақтардың көмегімен өрт сөндірілген.
Полиция қызметкерлері күніне орай ауыр атлет, ІІМ Әскери-тергеу департаментінің қызметкері Бауыржан Камалиев 32 тоннаны құрайтын «AH-74TK-200» ұшағын бірнеше метрге дейін орнынан жылжытып, өзінің бесінші әлемдік рекордын орнатуға тырысты.
Менің бірінші рекордым – 276 тоннаны құрайтын 2 локомотив. Одан кейін 42 тонналық FlyArystan-ның ұшағы болды. Сонымен қатар 10 «Toyota Land Cruiser 200» көлігін сүйредім. Бұдан басқа 2 рекордым ресми рекорд санатына енгізілмей қалды. Былтыр тікұшақты да сүйредім, - деді Бауыржан Камалиев.
Ауыр атлет болғандықтан, спортпен күнделікті айналысамын. Жаман әдеттерге мүлде жақын емеспін. Бұл бесінші рекордты орнатуға екі күн ғана дайындалдым. Жастарды спортпен айналысуға, әскерге баруға шақырамын, - деп өз әсерімен бөлісті.
Пресс-тур аясында құқық қорғау органдарының ұшақ және тікұшақ паркімен танысуға мүмкіндік берілді.