Қазақстанда осы уақытқа дейін тегін болған коммуналдық айыптұрақтар енді ақылы форматқа көшеді. Бұған дейін көлігі айыптұраққа жеткізілген жүргізушілер тек әкімшілік айыппұл төлеп келсе, көлікті сақтау шығындары жергілікті бюджет есебінен өтелетін.

Енді жағдай өзгереді. Заңнамаға енгізілген түзетулерге сәйкес, мәслихаттарға айыптұрақ қызметіне ақы белгілеу құқығы берілді. Бұл тетік жергілікті бюджет кірісін арттыру мақсатында енгізіліп отыр.

Алғашқылардың бірі болып Астана қаласында ресми тарифтер бекітілді. Олар айлық есептік көрсеткішке (2026 жылы 4325 теңге) байланыстырылған. Жаңа жүйе 23 сәуірден бастап күшіне енеді. Оған дейін бір ай бойы түсіндіру жұмыстары жүргізіледі.

Тарифтер қандай?

Жаңа ережеге сәйкес, жеңіл көлікті эвакуациялау құны – 12 975 теңге (3 АЕК).

Көлікті айыптұрақта сақтау ақысы:

алғашқы тәулік – 12 975 теңге;

екінші күннен бастап – тәулігіне 21 625 теңге (5 АЕК).

Жүк көліктері үшін (3,5 тоннаға дейін):

бірінші күн – 21 625 теңге (5 АЕК);

кейінгі күндер – тәулігіне 30 275 теңге (7 АЕК).

Ал мотоцикл иелері:

бірінші күн үшін – 4 325 теңге;

келесі күндер үшін – 8 650 теңгеден төлейді.

Қандай тәуекелдер бар?

Сарапшылар бұл өзгерістер бірқатар мәселеге әкелуі мүмкін екенін ескертеді. Ең алдымен, жоғары тарифтер жүргізушілерді «мәселені сол жерде шешуге» итермелеуі ықтимал.

Сонымен қатар даулы жол-көлік оқиғалары кезінде кінәсіз тараптың өзі де айыптұрақ қызметі үшін ақы төлеуге мәжбүр болуы мүмкін. Ал сот процестері ұзаққа созылған жағдайда, жиналған берешек көлемі айтарлықтай өсіп, кей жағдайда жеңіл көлік үшін миллион теңгеден асып кетуі ықтимал.