Қазақстанның Еңбек және халықты әлеуметтік қорғау министрлігі зейнетақының жаңа мөлшерін жариялады, деп хабарлайды El.kz интернет порталы.

2025 жылғы 1 шілдедегі жағдай бойынша Қазақстанда зейнетақының орташа жиынтық мөлшері 143 529 теңгені құрады. Бұл сомаға ынтымақты зейнетақы – 95 912 теңге, сондай-ақ базалық зейнетақы төлемі – 47 617 теңге кіреді. Бұл мәліметтерді ҚР Еңбек және халықты әлеуметтік қорғау министрлігі ұсынды.

Министрлік еске салғандай, 2025 жылғы 1 қаңтардан бастап:

• Базалық зейнетақы төлемінің мөлшері Ұлттық банк белгілеген болжаулы инфляция деңгейіне сәйкес 6,5%-ға ұлғайтылды;
• Ынтымақты (солидарлық) зейнетақының мөлшері инфляция деңгейінен 2%-ға жоғары өсіммен 8,5%-ға арттырылды.

Минималды және максималды базалық зейнетақы мөлшерлері қалай өзгерді

Мемлекет басшысының тапсырмасына сәйкес, 2023 жылдан бастап бес жыл ішінде базалық зейнетақы жыл сайын артып келеді. Осы мақсатта:

• 2025 жылғы 1 қаңтардан бастап минималды базалық зейнетақы мөлшері 65%-дан 70%-ға дейін көтерілді, бұл 32 360 теңгені құрайды;
• Максималды мөлшер 105%-дан 110%-ға дейін ұлғайтылды – бұл 50 851 теңге көлемінде белгіленді.

Базалық зейнетақыны есептеу тәртібі

ҚР Еңбек министрлігінің түсіндіруінше, 2018 жылғы 1 шілдеден бастап базалық зейнетақы төлемі әрбір алушыға жеке тәртіппен, оның зейнетақы жүйесіне қатысу өтіліне байланысты есептеледі.

Өтілге келесі кезеңдер кіреді:

• 1998 жылғы 1 қаңтарға дейінгі еңбек өтілі (солидарлық жүйедегі);
• Міндетті зейнетақы жарналары (МЗЖ) төленген кезеңдер.

Егер зейнетақы жүйесіне қатысу өтілі:

• 10 жыл немесе одан аз болса, базалық зейнетақы мөлшері тіршілік минимумының 70%-ын құрайды;
• 10 жылдан асқан әр жыл үшін төлемге қосымша 2% қосылады;
• 20 жылдық өтіл кезінде – 90%;
• 30 жыл және одан артық болған жағдайда – максималды 110% мөлшер белгіленеді.

Айта кету керек: бір айда Бірыңғай жинақтаушы зейнетақы қорына (БЖЗҚ) бірнеше мәрте жарна аударылған жағдайда да, бұл кезең бір ай ретінде есептеледі. Осыған байланысты міндетті зейнетақы жарналарын тұрақты әрі толық аудару болашақ базалық зейнетақы мөлшеріне оң әсер етеді.

Ынтымақты (солидарлық) зейнетақының есептелу тәртібі

Жасына байланысты зейнетақы төлемінің мөлшері мына факторларға байланысты есептеледі:

• 1998 жылғы 1 қаңтарға дейінгі еңбек өтілі (кемінде 6 ай болуға тиіс);
• Зейнет жасына дейінгі кезеңдегі орташа айлық табыс.

Бұған дейін зейнетақыны мерзімінен бұрын алу ережесі өзгеретіні туралы жазған едік.