Қазақстан Үкіметі зейнетақы, әлеуметтік жәрдемақы және төлемдерді индексациялау үшін шамамен 800 миллиард теңге қарастырды, деп хабарлайды El.kz интернет порталы.

Бұл туралы Сенат отырысында премьер-министрдің орынбасары – Ұлттық экономика министрі Серік Жұманғарин мәлімдеді.

Мақсат — халықтың әлсіз топтарын қорғау

Жұманғариннің айтуынша, бұл шаралар салық реформалары мен инфляциялық қысым жағдайында әлеуметтік осал топтарды қорғауға бағытталған.

Біз зейнетақы, жәрдемақы және әлеуметтік төлемдерге шамамен 800 млрд теңге бөлуді көздеп отырмыз. Бюджет бұл мүмкіндікке ие, сондықтан халық үшін үлкен күйзеліс болмайды деп есептеймін, — деді министр.

Мүгедектігі бар азаматтарға қосымша қолдау

• I және II топтағы мүгедектер үшін ай сайынғы салық салынбайтын табыс көлемі 289 мыңнан 1,6 миллион теңгеге дейін ұлғайтылды;
• Бұл 350 мың адамға 12 миллиард теңге үнемдеуге мүмкіндік береді.

Көлік салығы азаяды

• 10 жылдан асқан көліктерге — салық 30%-ға төмендейді;
• 20 жылдан асқан көліктерге — 50%-ға азаяды;
• Бұл арқылы азаматтар 30 миллиард теңгеге дейін үнемдей алады.

Жалақысы төмен қызметкерлерге жеңілдік

Прогрессивті салық шкаласын енгізуге байланысты үкімет 30 АЕК мөлшерінде стандартты шегерім енгізді (2025 жылы шамамен 120 000 теңге). Бұл:

• 140 мың теңгеге дейін жалақы алатын азаматтарды табыс салығынан босатады;
• Бұл барлық жұмыс істейтіндердің 53%-ына, яғни 3,8 миллион адамға қатысты;
• Олар қосымша 90 миллиард теңге үнемдей алады.

Баға өсуіне бақылау жалғасуда

Вице-премьер салық өзгерістеріне дейін-ақ кейбір кәсіпорындардың бағаны көтеріп үлгергенін айтып, мемлекет тарапынан бақылау күшейтілетінін жеткізді.

Айта кетейік, бұған дейін зейнетақы мөлшері 120 пайызға дейін өсетіні туралы жазған едік. Сонымен қатар, жеке табыс салығы (ЖТС) есебіндегі стандартты шегерімнің ұлғаюымен байланысты миллиондаған қазақстандықтың жалақысы көтерілетіні туралы жаздық.