Қазақстанда ауылдық елді мекендерді жоғары жылдамдықты интернетпен қамтамасыз ету бағытындағы жүйелі жұмыстар қарқын алып келеді. Бұл бастама Қазақстан Республикасы Жасанды интеллект және цифрлық даму министрлігі мен «Қазақтелеком» АҚ арасындағы инвестициялық келісім негізінде, «Қолжетімді интернет» ұлттық жобасы аясында жүзеге асырылып отыр.
Қазіргі таңда жоба шеңберінде ауылдардағы 600-ден астам нысан интернет желісіне қосылды. Атап айтқанда, 330 ауылдағы 584 нысан спутниктік байланыс арналары арқылы ғаламторға қол жеткізсе, тағы 14 ауылдағы 24 нысан тұрақты әрі жоғары жылдамдықты байланысты қамтамасыз ететін талшықты-оптикалық байланыс желілері (ТОБЖ) арқылы қосылған. Бұл – шалғайдағы елді мекендер үшін цифрлық инфрақұрылымның нақты жақсарып келе жатқанын көрсететін көрсеткіш.
Жобаны іске асыру барысы бекітілген жоспарға сәйкес жүргізілуде. Негізгі мақсат – қала мен ауыл арасындағы цифрлық алшақтықты қысқарту, тұрғындардың заманауи онлайн қызметтерге тең қолжетімділігін қамтамасыз ету. Жоғары жылдамдықты интернеттің ауылға жетуі мемлекеттік цифрлық қызметтерді пайдалануды жеңілдетіп қана қоймай, қашықтан білім алу, телемедицина, электронды сауда және басқа да онлайн-сервистерді дамытуға кең мүмкіндік береді.
Инвестициялық келісім аясында телекоммуникациялық инфрақұрылымды ауқымды түрде жаңғырту көзделген. Жалпы алғанда, жоғары жылдамдықты интернет 3 мыңнан астам ауылдық елді мекенге жеткізіледі. Бұдан бөлек, 2027 жылдың соңына дейін тағы 3 мыңнан астам ауылды магистральдық талшықты-оптикалық байланыс желілеріне қосу жоспарланып отыр. Соның нәтижесінде, үй шаруашылықтарын қосу мүмкіндігі бар ТОБЖ желісі еліміздің 4 786 ауылында қолжетімді болмақ.
Жоба толық жүзеге асқан кезде Қазақстан ауылдарының 90 пайыздан астамы сымды технологиялар арқылы жоғары жылдамдықты интернетпен қамтылады деп күтілуде. Ал 2027 жылдың соңына қарай елдегі жоғары жылдамдықты интернеттің жалпы қолжетімділігі 99 пайызға жетеді деген болжам бар.
Осылайша, «Қолжетімді интернет» ұлттық жобасы тек техникалық инфрақұрылымды дамыту емес, сонымен қатар өңірлік теңгерімді сақтауға, ауыл тұрғындарының өмір сапасын арттыруға және елдің цифрлық әлеуетін күшейтуге бағытталған стратегиялық бастамаға айналып отыр.