2025 жылдың 15 қазанынан бастап Қазақстанда көліктерді eGov.kz порталы арқылы онлайн тіркеу мүмкіндігі пайда болды. Енді көлікті рәсімдеу үшін ХҚКО-ға барудың қажеті жоқ – барлық процесс толықтай электронды түрде жүзеге асады: төлем жасау, деректерді тексеру және тіркеуді растау барлығы онлайн өтеді. Бұл туралы Finratings.kz сайтына сілтеме жасай отырып El.kz интернет порталы хабарлайды.
Жоба Ішкі істер министрлігі мен Жасанды интеллект және цифрлық даму министрлігінің бірлескен бұйрығымен бекітілген. Құжат 2025 жылдың 15 қазанында күшіне енді және 2026 жылдың 31 тамызына дейін пилоттық режимде жұмыс істейді.
Онлайн тіркеу қалай жүргізіледі:
Көлік сатушысы (заңды тұлға) eGov.kz порталында өтінім жасайды және көліктің VIN-кодын енгізеді.
Жүйе деректерді автоматты түрде бірнеше базада тексереді: ОКЭД, электрондық техпаспорт, утилизациялық және кедендік төлемдер, сондай-ақ сатып алушының ЖСН бойынша деректері.
Сатушы өтінімді электрондық цифрлық қолтаңбамен (ЭЦҚ) растайды.
Сатып алушыға хабарлама келеді, ол да өтінімді растап, ЭЦҚ арқылы қол қояды.
Жүйе тексеріс нәтижесін шығарады: «қызмет сәтті көрсетілді» немесе «бас тарту» және оның себебін түсіндіреді.
Барлық мемлекеттік баждар мен алымдар eGov.kz арқылы онлайн төленеді.
Маңызды ақпарат:
Онлайн тіркеу кезінде тек стандартты мемлекеттік нөмірлерді таңдауға болады – «әдемі» комбинациялар қолжетімсіз.
Тіркеу аяқталған соң көлік иесі дайын құжаттар мен нөмірлерді алу үшін бір рет қана ХҚКО-ға барады.
Жеке куәлікті қағаз түрінде немесе цифрлық құжаттар сервисі арқылы көрсетуге болады.
Ішкі істер министрлігінің мәліметінше, жаңа қызмет көлік тіркеу процесін айтарлықтай жеделдетіп, ашықтықты арттырады.
Бұған дейін eGov порталы арқылы айыппұлдар мен салықтарды төлеу, жүргізуші куәлігін рәсімдеу және әлеуметтік жеңілдіктерге өтініш беру мүмкін болған.
Көлікті онлайн тіркеу – бұл қызметтердің толық цифрлануына жасалған маңызды қадам. Ол көлік сатып алу және сату кезінде қағаз құжат айналымын толығымен жояды.