Lonely Planet Қазақстанды Best in Travel-2025 жыл сайынғы рейтингінде саяхаттауға арналған ең үздік елдердің бірі деп таныды. Бұл туралы El.kz ақпараттық агенттігінің тілшісі «Kazakh Tourism» ҰК» АҚ-ға сілтеме жасай отырып хабарлайды.
Айта кету керек, жыл сайын Lonely Planet сарапшылары саяхатшылардың, қызметкерлердің, авторлар мен басқа да туризм саласындағы мамандардың ұсыныстары негізінде рейтинг жасақтайды. Осылайша, 2025 жылғы таңдау Қазақстанға түсті. Сарапшылар еліміздің тарихы бай, ландшафттары алуан түрлі, бірегей мәдени мұрасы бар деп мақтап отыр.
Lonely Planet — саяхат бойынша егжей-тегжейлі кеңестер мен ұсыныстар беретін жетекші халықаралық туристік басылым. Ол 1973 жылдан бері жұмыс істеп келеді. 50 жылдан астам тарихы бар. Lonely Planet 14-тен астам тілде гидтер шығарып, 195 елді қамтиды. Lonely Planet бағыттар туралы ақпарат беріп қана қоймай, адамдарды саяхатқа шабыттандырады. Әр елдің көрікті жерлері туралы тізімдер мен мақалаларды жариялайды. Олардың қатарында Best in Travel секілді тізім бар.
Best in Travel әлем туристері үшін саяхаттауға арналған ең өзекті әрі үздік бағыттарды ұсынады. Басты назарда - туризм принциптерін ұстанатын елдер мен аймақтар.
Қазақстан Республикасының Туризм және спорт вице-министрі Ержан Еркінбаев: «Қазақстанның мұндай беделді Lonely Planet басылымының Best in Travel 2025 рейтингіне енуі еліміздің туризміне жаһандық деңгейде қызығушылықтың артып келе жатқанын көрсетеді. Елдің шынайы мәдениетін және көз жауын алар табиғатын халықаралық деңгейде насихаттай отырып, тұрақты туризм принциптерін ұстанамыз»,-деді.
Lonely Planet басылымының контент бойынша аға вице-президенті және атқарушы редакторы Нитя Чамберс Best in Travel 2025-ті әлемге арналған жыл сайынғы махаббат хатымыздың соңғы нұсқасы деп сендірді.
Біздің тізім жаңа саяхаттарға шабыттандырады! -деді ол.
Басылымда Қазақстан көне дәстүрлер мен заманауилық үйлесім тапқан ел ретінде сипатталады. Lonely Planet басылымында: «Қазақстан — жай ғана саяхаттауға арналған жер емес, Қазақстан - тұтас әлем!» делінген. «Қазақ қалаларын қоршаған шексіз далалықтан ежелгі Жібек жолының сыбдыры естіледі»,-дейді басылым.
Әлемге әйгілі туристік басылымдар Қазақстанның туристік әлеуетін жоғары бағалайды.
Еске сала кетейік, «Conde Nast Traveler» және «Wanderlust» басылымдары Қазақстанды 2024 жылғы саяхаттауға арналған үздік әлемдік бағыттардың қатарына қосты. Сондай-ақ Алматы қаласы The New York Times басылымы бойынша үздік 52 туристік бағыттардың қатарына енген болатын.