Қазақстан футболында төрешілерді тағайындау мен бағалаудың жаңа дәуірі басталуы мүмкін. Telegram желісіндегі ЖаркOFF арнасы инсайдерлік мәліметке сүйеніп, AAR (Artificial Assistant to Referee) – төрешіге арналған жасанды интеллекттік көмекші жүйесі туралы құпия хаттың мазмұнын жариялады, деп хабарлайды El.kz интернет порталы.

Хатта жазылғандай, қазіргі таңда жоғарғы деңгейдегі футбол құрылымдары төрешілердің жұмысын автоматты түрде талдайтын және мінез-құлқын зерделейтін цифрлық жүйені сынақтан өткізіп жатыр. Бұл жүйе болашақта матчтарға төрешілерді әділ әрі ашық түрде тағайындауға сеп болуы мүмкін.

ЖИ қалай жұмыс істейді:

• Төреші туралы жүздеген параметрді жинайды: даулы шешімдер, күмәнді ойындар, симпатия мен антипатия, ықтимал мүдделер қақтығысы;
• «Қызыл жалаушалар» арқылы қауіп-қатерлерді белгілейді;
• Белгілі бір төрешіні нақты ойынға тағайындауға болмайтыны туралы ұсыныстар береді — «жүйелік қайталануларды» болдырмау үшін;
• Қоғамдық резонанс деңгейін болжай алады — белгілі бір арбитр бұған дейін сынға іліксе, ЖИ оны есте сақтайды және ескертеді.

Жүйе нені ескереді:

• Төрешінің психологиялық бейіні: кім қысымға төзімді, кім тұрақсыз, кім шешімдерде бірізді;
• Букмекерлік линиялармен салыстыру: күмәнді сәйкестіктер ішкі тергеуге себеп болуы мүмкін;
• VAR жүйесімен бірігу: егер ЖИ қалыптан ауытқулар байқаса, төрешіге уақытша шектеу қойылуы ықтимал.

Ақпарат кімдерге қолжетімді:

• Жүйенің толық мәліметі тек шектеулі тұлғаларға ашық болады;
• Олардың қатарында футбол федерациясы мен төрешілер комитетінің жетекшілері бар делінген;
• Ал қарапайым жанкүйерлерге «төрешіге деген сенім индексі» ашық көрсетіле ме – бұл әзірге белгісіз.

Құпия хатта:

Егер бұл жүйеге ресми түрде жол ашылса, төрешілерге әсер ету, «телефон арқылы шешу» кезеңі аяқталады. Себебі ЖИ ешкімнен қорықпайды, ешкімнің мүддесін қорғамайды, - делінген.

AAR – болашақтың әділ бағдарламасы ма, әлде «қисық» төрешілер үшін қауіп пе? Жақында бәрі белгілі болады.