Қазақстан дзюдошылары Душанбе Гранд Слэмінен жалғыз қоламен оралды

Душанбеде аяқталған Гранд Слэм турнирінде Қазақстан құрамасы жалғыз қола жүлдемен елге оралды, деп хабарлайды El.kz ақпарат агенттігі.

Үш күнге созылған дәстүрлі турнирге Қазақстан құрамасынан Әбиба Әбужақынова (48 келі), Алдияр Қарағұлов (60 келі), Нұрмұхаммет Ботабай (66 келі), Ықылас Әлсейіт (73 келі), Аңсарбек Ғайнуллин (81 келі), Досхан Жолжақынов (81 келі), Ермұхан Естай (100 келі), Мұхаммедәли Мавлидов (100 келі) белдескен болатын. 

Алайда тек әйелдер құрамасынан жалғыз өзі барған Абиба Әбужақынова ғана қола жүлдеге қол жеткізді. Бұл сында отандық татами шеберлері жаппай жеңіліп, тәжік астанасынан жалғыз қоламен қайтуға мәжбүр болды. Абиба Әбужақынова наурыз айында Линц қаласында өткен Гран При турнирінде чемпион атанған болатын. 

Жалпы, ұлттық құрама дзюдошылары 2025 жылдың басынан бері Баку және Ташкент Гранд Слэміне қола медаль олжалады.