Непалдағы алапат су тасқыны: қазақстандықтардың жағдайы белгілі болды

Непал мен Қытай шекарасында болған алапат су тасқынынан кейін Қазақстан азаматтары зардап шеккендер мен із-түзсіз жоғалғандар қатарынан әзірге анықталған жоқ. Бұл туралы Қазақстан Сыртқы істер министрлігі мәлімдеді.

Қазақстандық туристер туралы не белгілі?

СІМ мәліметінше, қазіргі уақытта Непал мен Қытай шекарасындағы табиғи апаттан зардап шеккендер немесе хабар-ошарсыз кеткендер арасында Қазақстан азаматтары тіркелмеген.

Бұған дейін апат аймағында 380-нен астам туристің жоғалғаны туралы ақпарат тараған еді. Қазақстанның сыртқы саяси ведомствосы олардың арасында қазақстандықтар жоқ екенін нақтылады. Министрлік жағдайды бақылауда ұстап отырғанын хабарлады.

Непалдағы апаттан жүздеген адам хабарсыз кеткен

Непалдың Қытаймен шекаралас аумағында болған кенеттен су тасқыны мен сел салдарынан қаза тапқандар мен жоғалғандар саны бірнеше жүз адамға жетті.

Непалдың табиғи апаттар қаупін азайту жөніндегі ұлттық басқармасының мәліметінше, 800-ден астам адам хабар-ошарсыз кеткен. Олардың арасында қауіпсіздік күштерінің қызметкерлері, жергілікті тұрғындар және туристер бар. Ал Непал полициясының мәліметі бойынша, апаттан кейін 165 адамның денесі табылған. Туристер арасында хабарсыз кеткендердің саны 500-ден асады.

Қытайдың мемлекеттік БАҚ-тары Тибет аумағында кемінде үш адамның қаза тапқанын, 558-ден астам адамның із-түзсіз жоғалғанын хабарлады. Олардың кемінде 260-ы – шетел азаматтары. Алайда Непал мен Қытай тараптары келтірген статистиканың қаншалықты өзара қиылысатыны әзірге белгісіз.

Неліктен апат аймағында туристер көп болды?

Табиғи апат болған өңір ұйымдастырылған туристік бағыт ретінде аса танымал болмаса да, дәл осы кезеңде Непалға туристер мен қажылар көп барады.

Бұған өңірдегі діни нысандардың маңызы себеп. Непал мен Тибет аумағында индуизм, буддизм және джайнизм өкілдері үшін қасиетті саналатын бірнеше орын бар.

Солардың бірі – Қытай аумағындағы Кайлаш тауының маңындағы Мансаровар көлі. Екіншісі – Непалдағы Госайкунда көлі. Жыл сайын ондаған мың турист Непал арқылы Мансаровар көліне сапар шегеді. Ал қасиетті орындарға бару үшін дәл осы кезең қолайлы саналады.

Апатқа не себеп болды?

Табиғи апаттың нақты себебі әзірге толық анықталған жоқ. Алдын ала болжам бойынша, су тасқынына таулы аймақта болған опырылым немесе сел себеп болуы мүмкін. Непал Сыртқы істер министрі Шишир Кханалдың айтуынша, бастапқыда опырылымға таңертең болған жер сілкінісі себеп болуы мүмкін деген болжам айтылған.

Алайда АҚШ Геологиялық қызметі кейінірек жер сілкінісі болмағанын, тіркелген сейсмикалық энергия опырылымнан туындағанын хабарлады.

Непал метеорологиялық орталығының мамандары спутниктік суреттерге сүйене отырып, Тибеттегі тау шыңдарының бірінен мұздықтың алып бөлігі опырылған болуы мүмкін деген болжам жасады.

Мамандардың нұсқасы бойынша, мұз бен тау жыныстары өзен арнасын бөгеп, кейін пайда болған табиғи бөгет бұзылған. Соның салдарынан лай мен су үлкен жылдамдықпен төмен қарай ағуы мүмкін.

Ғалымдар апаттың нақты себебін спутниктік түсірілімдер толық зерттелгеннен кейін ғана анықтауға болатынын атап отыр.

Сел мен су тасқыны

Сел мен су тасқынының негізгі соққысы Непалдың Расува және Нувакот аудандарына тиген. Лхенде өзені арқылы өтетін шатқалда орналасқан шекаралық бақылау бекетін су мен лай ағыны толығымен шайып кеткен. Осы нысанда қызмет атқарған 70-тен астам әскери қызметкер, полиция, кеден және шекара бақылауы қызметкерлері де хабарсыз кеткендер қатарында.

Апат салдарынан жолдар, көпірлер, байланыс желілері және энергетикалық инфрақұрылым нысандары елеулі зақымданды.

Әлеуметтік желіде тараған және BBC Verify тексерген кадрларда Непалдың Трисули-Базар қаласында су ағынының көпір мен бірнеше ғимаратты шайып кеткенін көруге болады.

Іздеу-құтқару жұмыстары жалғасып жатыр

Непал армиясы табиғи апаттан зардап шеккен аудандарда іздеу-құтқару жұмыстарына 2 мыңға жуық әскери қызметкерді тартты. Операциялар жер үстінде де, әуеден де жүргізіліп жатыр.

Құтқарушылар ең көп зардап шеккен Расува мен Нувакот аудандарына басымдық беруде.

Непал мен Қытай билігі апаттың салдарын жою және іздеу-құтқару жұмыстарын үйлестіруде.

Қазақстандықтар арасында зардап шеккендер мен жоғалғандар туралы ақпараттың әзірге болмауы – қазақстандық туристер үшін жағымды жаңалық. Дегенмен жағдай күрделі болғандықтан, Қазақстан СІМ оқиғаларды бақылауда ұстап отыр.