Надежда Рябец – Азия чемпионы

Надежда Рябец Азия чемпионатында ел қоржынына алғашқы алтын жүлдені салды

Бүгін Моңғолия астанасы Ұлан-Батырда бокстан әйелдер арасындағы Азия чемпионатының финалдық жекпе-жектері өтіп жатыр. 

Тәжірибелі боксшы Надежда Рябец -80 кг дейінгі салмақтың ақтық айқасында өзбек былғары қолғап шебері Рухшона Парпиева жұдырықтасты. Алма кезек шабуылмен өткен кездесуде отандасымыз басым түсті. Есеп: 5-0.

Надежда жартылай финалда Пуджа Раниді (Үндістан) 3-1 есебімен ұтқан. Спортты дамыту дирекциясының мәліметінше, бұл – Рябецтің ересектер санатындағы сары құрлық бәсекесіндегі алғашқы алтыны.

Осыған дейін шаршы алаңға шыққан Бақыт Сейдіш (-70 кг) күміс жүлдеге ие болды. Енді аса ауыр салмақтағы (+80 кг) Дина Исламбекова финалда бақ сынайды.

Бұдан бұрын әйелдер сапынан Айгерім Сәттібаева (-48 кг) мен Валентина Хальзова (-75 кг) қола жүлдеге қол жеткізген.