Еліміздің бас ұстазы Ғани Бейсембаев "Министрге хат" бастамасы аясында өзіне хат жазған оқушымен кездесті, деп хабарлайды El.kz интернет порталы.
Бұл туралы Оқу-ағарту министрі желі парақшасында жазды. Ондағы мәліметке сүйенсек, бар-жоғы бір айдың ішінде еліміздің түкпір-түкпіріндегі балалардан 235 хат түскен.
Әр хатты оқыған сайын шынайылыққа, мейірімге, үмітке толы балалық шақтың үні естілгендей еді. Солардың ішінде бір хат менің жанымды айрықша толқытқанын білесіздер. Жазған әр жолынан өмірге деген құштарлық пен рух биіктігі сезілгендіктен, мен бұл хаттың авторымен жеке жүздесуді жөн көрдім. Осылайша, Тараз қаласындағы №66 мектептің оқушысы Артем Погореловты елордаға арнайы қонаққа шақырдым. Артем де еліміздегі 3,9 миллион бала сияқты жаңа оқу жылын асыға күткен өрен. Ол әңгімесін бастаған сәттен-ақ мектебін, ұстаздарын, достарын қалай сағынғанын ерекше шабытпен жеткізді. Оның тағдыр жолында кездескен қиындықтарға мойымаған қайсарлығы, ойының сергектігі мен болашаққа деген сенімі маған ерекше әсер етті. Биыл Артем сегізінші сыныпта оқиды, әр ойын саралап, сөзін салмақтап жеткізетін парасат иесі болып өсіп келеді екен. Қазақ тілін ерекше сүйіп оқитынын мақтанышпен айтты. Ұлттың ұлылары Абай мен Мұқағалидың жырларын жатқа оқып қана қоймай, қазақ классиктерінің шығармаларын жастар арасында кеңінен насихаттау туралы идеясымен мені қуантты әрі таңғалдырды.
Оның зеректігіне тәнті болып, Абай және халқымыздың тарихынан сыр шертетін шежірелі кітаптарды сыйға тарттым. Ал қазақ үшін киелі қара домбыраны ұсынған сәтте, Артемнің қуанғанын байқадым, ол көптен бері домбыра тартуды армандап жүрген екен,-деп жазды Ғани Бейсембаев.
Министрдің жазуынша, оқушымен кездесту барысында олар әке мен баладай сыр бөліскен. Артемнің ұстаздарына деген шынайы ілтипаты, болашаққа деген үміті мен жігері министрді тәнті еткен.
Үздіксіз қасымда жүрсе де, бір сәтке де байыптылығынан танбаған Артем қоштасар сәтте «Уақытыңызды бөліп, мені тыңдағаныңыз үшін рақмет. Бұл менің өмірімдегі ең маңызды кездесулердің бірі болды», – деді. Бұл сөздер менің жүрегімде мәңгілікке сақталары анық.
Артем, балам! Шын жүректен сөйлеп, жас ұрпақтың саналы, парасатты, жігерлі екенін өз үлгіңмен дәлелдегенің үшін, болашаққа арнаған биік мақсаттарыңмен бөліскенің үшін, аға буынға сенім артқаның үшін саған алғыс айтамын. Біз сендердің сол сенімдеріңді ақтау үшін және жарқын болашақтарыңды қамтамасыз ету үшін бүгін де, ертең де бар күшімізді саламыз,-делінген жазбада.
Өз сөзінде министр акция аясында келіп түскен хаттардың барлығына дерлік жауап беріліп жатқанын атап өтті. Ал кейбір хат иелерімен мен өңірлерге жұмыс сапарымның барысында жеке кездесіп, сұқбаттасуды жоспарлап отыр екен.