ҚМА қызметкерлері жоғары сынып оқушыларына арналған қаржылық сауаттылық сабақтарын өткізуде, деп хабарлайды El.kz. Бұл туралы Қаржылық мониторинг агенттігі мәлімдеді.
«Экономикалық және қаржылық қауіпсіздік. Халықтың қаржылық сауаттылығы» тақырыбында оқушылармен семинар-кездесулер өткізілді. Аталған бастама Астана қаласы әкімдігінің қолдауымен жүзеге асырылды.
Бұдан басқа, Агенттіктің аумақтық департаменттерімен Қостанай, Орал, Ақтөбе, Шымкент, Атырау, Өскемен және Тараз қалаларындағы оқушылар үшін қаржылық қауіпсіздік бойынша сабақтар өткізіліп жатыр.
Оқушылар Экономикалық тергеу қызметінің тәжірибелі қызметкерлерінен банктік карталар, интернет-сатып алулар және қаржы пирамидаларымен байланысты әртүрлі қаржылық алаяқтық схемалары туралы ауқымды ақпарат алды.
Еске сала кетейік, Мемлекет басшысының ел азаматтарының құқықтық және қаржылық сауаттылығын арттыру жөніндегі тапсырмасы аясында ағымдағы жылы Агенттік Оқу-ағарту министрлігінің қолдауымен 5-11 сынып оқушыларына арналған үлгілік оқу жоспарының вариативтік компонентіне «бизнес және кәсіпкерлік негіздері» және «қаржылық сауаттылық» екі компонентін қамтитын «жаһандық құзыреттер» курсы енгізілді.
Сондай-ақ, ҚР Оқу-ағарту министрлігі Агенттіктің 2022-2023 оқу жылының екінші жартыжылдығында жоғары сынып оқушылары арасында қаржылық қауіпсіздік бойынша республикалық олимпиада өткізу жөніндегі бастамасын қолдады.