Кітап оқу – адамның ой-өрісін кеңейтіп, тіл байлығын арттыратын, тұлғалық дамуға тікелей әсер ететін маңызды әдет. Алайда қазіргі қарбалас өмірде көпшілік кітап оқуға уақыт таппайтынын немесе бастаса да соңына дейін жеткізе алмайтынын мойындайды. Бұл – ниеттің жоқтығынан емес, дұрыс әдет қалыптастырмаудан туындайтын мәселе, деп жазады Еl.kz интернет порталы. 

Ең алдымен кітап оқуды міндет емес, өзіңе арналған пайдалы уақыт ретінде қабылдау керек. Кітапты «оқуым керек» деген қысыммен емес, «өзім үшін оқимын» деген оймен қолға алған жөн. Қызықты тақырыптан бастау, өз талғамыңа сай жанрды таңдау кітапқа деген ішкі қызығушылықты оятады.

Кітап оқуды әдетке айналдырудың тағы бір тиімді жолы – нақты уақыт белгілеу. Күніне 10–15 минуттан бастау жеткілікті. Таңертең немесе ұйқы алдында тұрақты бір уақытты кітапқа арнау арқылы ми сол мезетті оқумен байланыстыра бастайды. Уақыт өте келе бұл әдет автоматты әрекетке айналады.

Сонымен қатар қолжетімділік маңызды рөл атқарады. Кітап әрдайым көз алдыңда болғаны дұрыс: сөмкеде, жұмыс үстелінде немесе телефонда электронды нұсқасы тұрсын. Әлеуметтік желіге кіретін сәттің орнына бірнеше бет оқып кету – ұсақ көрінгенімен, үлкен нәтижеге бастайды.

Оқығанды есте сақтап, қызығушылықты арттыру үшін ой бөлісу де пайдалы. Достармен, әріптестермен немесе онлайн кітап клубтарда оқыған кітабың туралы пікір алмасу оқу процесін жандандырады. Бұл тәсіл кітапты соңына дейін оқуға және жаңа кітаптарға деген ынтаны күшейтеді.

Ең бастысы – өзіңе қатты талап қоймау. Бір күн оқымай қалсаң, әдет бұзылды деп ойлама. Кітап оқу – марафон, жарыс емес. Тұрақтылық пен сабыр сақталса, уақыт өте келе кітап оқу күнделікті өмірдің ажырамас бөлігіне айналары сөзсіз.