ҚР Премьер-Министрі Әлихан Смайылов отандық кәсіпкерлер кеңесінің отырысын өткізді, онда агроөнеркәсіптік кешенді дамыту мәселелері қаралды, деп хабарлайды El.kz Үкіметтің баспасөз қызметіне сілтеме жасап.
Қатысушылар ауыл шаруашылығы өнімдерін сақтау және тасымалдау мәселелерін, сондай-ақ құс шаруашылығын, тұқым шаруашылығын және қант саласын дамыту мәселелерін талқылады. Ауыл шаруашылығы министрі Ербол Қарашөкеев өз баяндамасында қазіргі уақытта АӨК-ті субсидиялау жүйесін реформалау бойынша рәсімдерді оңайлату, қолданыстағы бағыттарды оңтайландыру және субсидиялардың жаңа түрлерін енгізу, инновацияларды пайдалануды ынталандыру және ауылда кооперацияны дамытуды көздейтін жаңа тәсілдер әзірленгенін айтты. Бұл ретте субсидиялаудың барлық бағыты бойынша мемлекеттік қаражат алушылар үшін бақылау құралдары мен қарсы міндеттемелерді енгізу жоспарлануда. Премьер-Министр түзетулер пакеті шеңберінде өнімнің бір бөлігін ішкі нарықта сату бойынша міндеттемені қарастыру қажет екенін атап өтті.
«Біз ауылшаруашылық тауар өндірушілер субсидия алып, барлық өнімдерді экспортқа шығарып жатқанын көріп отырмыз. Яғни, кейбір позициялар бойынша тапшылық байқалады, ал бұл бағаның өсуіне әкеледі. Сондықтан өнімнің бір бөлігі ішкі нарықта сатылуы керек. Мұны өндіріс пен тұтыну көлемінің негізінде анықтау қажет», — деді Әлихан Смайылов.
Үкімет басшысы салалық ведомствоға осы шараны пысықтауды тапсырды. Отырыс барысында «Майлы дақылдардың тәжірибелік шаруашылығы» ЖШС бас директоры Фарид Абитаев тауар өндірушілердің коммерциялық банктерге тәуелділігі мәселесін көтерді, себебі аграршылар несиелер бойынша пайыздық мөлшерлемені субсидиялауды автоматты түрде жоғалтуына байланысты қолдаудың жеңілдікті бағдарламаларына ауыса алмайды.
Ауыл шаруашылығы министрлігіне бұл мәселені қысқа мерзімде пысықтау тапсырылды.
«Қазір “Атамекен” ҰКП-мен бірге кәсіпкерлерге қойылатын талаптар қайта қаралып жатыр. Субсидиялау ережелеріне сәйкес, бизнес тап болатын барлық түсініксіздіктер мен қайшылықтарды олардың көмгімен жою бойынша жұмыс жүргізу қажет. Мұны қысқа мерзімде жасау керек», — деді Әлихан Смайылов.
Отырыста «DALA-FRUIT.KZ» ЖШС құрылтайшысы Болатбек Нәжметдинұлы тағы бір проблемалық мәселені көтерді. Оның айтуынша, өңірлерде жергілікті жанар-жағармай құю бекеттері дизель отынын транзиттік көліктерге құюды жөн көреді, ал төмендетілген бағамен алатын отандық машиналар отынсыз қалуда.
«Жаңа төлем жүйесі дүйсенбіден бастап енгізілді. "Талапқа бағынбаған" жанармай құю бекеттерінің лицензиясын қайтарып алуға дейін жазалаймыз. Сондықтан бұл мәселе жақын арада реттеледі», — деді Премьер-Министр.
Сондай-ақ отырыста «Алель Агро» АҚ басқарма төрайымы Рәзия Жатақпаева мен «АқсуҚант» ЖШС құрылтайшысы Қайрат Оразбеков өз ұсыныстарын айтты. Талқылауды қорытындылай келе, Әлихан Смайылов ауыл шаруашылығы саласында жоспарланып отырған реформалардың негізгі міндеттері өнімділікті арттыру және соның есебінен елдің азық-түлік қауіпсіздігін қамтамасыз ету екенін атап өтті. Бұл ретте тиімділікті арттыру үшін жаңа тәсілдер бизнес-қоғамдастықпен пысықталып жатыр.