Кешкі ас ішудің денсаулық пен салмақты бақылау үшін ең пайдалы уақыты бар. Дегенмен бәріне бірдей қатаң уақыт кестесін ұстану міндетті емес – әр адамның өмір ырғағы мен күн тәртібі ескерілуі керек, деп хабарлайды El.kz интернет порталы.

Кешкі асқа ең ыңғайлы уақыт

Жалпы алғанда, кешкі ас ішуге ең қолайлы уақыт – сағат 17:00 мен 19:00 аралығы. Егер бұл уақыт сіздің кестеңізге сай келмесе, онда ұйықтардан шамамен үш сағат бұрын тамақтану ұсынылады.

Бұл ас қорытудың дұрыс жүруін қамтамасыз етіп, асқазан рефлюксі қаупін азайтады.

Алайда тағамның мөлшері мен құрамына қарай бұл уақыт өзгеруі мүмкін. Мысалы, екі қабатты бургер мен үлкен порция қуырылған картоп сияқты майлы тағамдар алты сағаттан артық уақыт қорытылады.

Сондықтан мұндай тағамдар асқазандағы қышқыл деңгейін арттырып, оның өңешке қысым түсуіне, нәтижесінде рефлюкс пен ұйқының бұзылуына әкелуі мүмкін.

Егер сіз кешкі асқа тым ерте – мысалы, сағат 15:00 шамасында отырсаңыз, ұйықтар алдында аштық сезімі мазалауы мүмкін. Мұндай жағдайда жеңіл тіскебасар жеу ұсынылады. Ол көмірсулар, ақуыз және аз мөлшерде май үйлескен тағам болуы керек. Көмірсулар ерекше маңызды, себебі олар серотониннің, ал ол өз кезегінде мелатониннің түзілуін ынталандырады.

Күн сайын бір уақытта кешкі ас ішу керек пе?

Адам ағзасы тұрақты күн тәртібіне жақсы бейімделеді, сондықтан кешкі асты белгілі бір уақытта ішу циркадтық ырғақтың (ішкі биологиялық сағаттың) дұрыс жұмыс істеуіне көмектеседі.

Бұл жалпы денсаулық үшін өте маңызды, өйткені ішкі ырғақтың бұзылуы зат алмасу процестерін әлсіретіп, диабет пен жүрек ауруларының қаупін арттырады.

Егер сізге тұрақты уақытта кешкі ас ішу қиын болса, тамақ дайындауды күнделікті дағдыңызға енгізіңіз – бұл әр кеш сайын дайын тағамның болуын қамтамасыз етеді.