Иран аумағында пайда болған «қышқыл бұлттар» Орталық Азия елдеріне жетуі мүмкін деген ақпарат ғылыми деректермен және бақылау нәтижелерімен расталмаған, деп хабарлайды El.kz Қазгидрометке сілтеме жасап.

Мекеме мамандарының айтуынша, қышқыл жауын-шашын күкірт пен азот оксидтерінен түзіледі. Бұл заттар атмосфераға негізінен өнеркәсіп, энергетика және көлік саласынан бөлінеді. Әдетте мұндай жауын-шашын ластану көздеріне жақын аймақтарда пайда болады.

Ауа массалары алыс қашықтыққа тасымалданған кезде табиғи атмосфералық процестердің әсерінен бұл заттардың концентрациясы айтарлықтай төмендейді.

Мониторинг деректеріне сәйкес, Қазақстан мен Орталық Азия елдері бағытына мұндай ластаушы заттардың таралу белгілері тіркелмеген.

Осыған байланысты мамандар азаматтарға ұлттық метеорологиялық және экологиялық қызметтердің ресми мәліметтеріне ғана сүйенуге және тексерілмеген ақпаратты таратпауға кеңес берді.