Ғылым және жоғары білім министрлігінің қолдауымен Ғылым қоры мен Л.Н.Гумилев атындағы Еуразия ұлттық университеті бірлесіп, ғылым мен бизнестің интеграциясы үшін «Технологияларды коммерцияландыру реакторы» диалогтық алаңын ұйымдастырды, деп хабарлайды El.kz ақпарат агенттігі.
Кездесу барысында қазақстандық ғалымдар құрылыс және жол-құрылыс салаларындағы жобаларын таныстырды. Әрбір қатысушының міндеті әлеуетті іскер серіктестер мен инвесторларға ғылыми әзерлемелерінің коммерциялық құндылығын жеткізу болатын.
Ғылым қоры» басқармасының төрағасы Камиль Ақатов: «Статистика бойынша, 50-ден астам реактор қатысушылары ҒҒТҚН коммерцияландыру конкурсына қатысып, Ұлттық ғылыми кеңестің таңдауынан сәтті өтеді, аталмыш алаң ғылым мен кәсіпті интеграциялауда өз тиімділігін көрсетеді де, қолданбалы ғылыми жобалар кәсіпке бағытталған экономиканы құруға мүмкіндік береді, - деп атап өтті.
Қазақстандық ғалымдар ұсынған инновациялық өнімдердің қатарында күрделі топырақ жағдайында құрылыс алаңдарына инженерлік-геологиялық зерттеулер жүргізу кезінде геоақпараттық мәліметтер базасын пайдалану технологиясын, дірілсіз технологияны пайдаланатын темірбетон бұйымдарды, темірбетонды қадалар, виброакустикалық бақылау жүйесі бар құрылыс алаңдары үшін қатты еден плиталарын, беріктігі және көтергіштігі жоғары қадаларды өндіру технологиясын, жол белгілеріне арналған еріткіште еритін бояу, құрамында күкірті бар құрылыс материалдарын атап көрсетуге болады.
Коммерцияландыру реакторы және осыған ұқсас диалог алаңдары - ғалымдар мен кәсіп үшін ғылыми жетістіктердің нәтижелерін неғұрлым сапалы және тиімді коммерцияландыруға, сондай - ақ оларды өндіріске енгізу үшін ынтымақтастықты жолға қоюдың жақсы мүмкіндігі. ЕҰУ экономиканың нақты секторындағы кәсіппен және ірі кәсіпорындармен ынтымақтастықты белсенді түрде кеңейтуде. Қазір 3D принтерлерді құрастыру бойынша шағын өндірістер құру, сондай-ақ шетелдік зерттеушілермен бірлесіп өнеркәсіп қалдықтарымен геополимерлі бетондар шығару бойынша технологиялық желіні орнату бойынша жұмыстар жүргізілуде, - деп атап өтті ЕҰУ-нің ғылым, коммерцияландыру және интернационалдандыру жөніндегі проректоры Жанна Құрманғалиева.
Құрылыс алаңдарының виброакустикалық мониторингі жүйесін әзірлеу жобасы авторларының бірі – PhD доктор, ЕҰУ профессоры Елбек Өтеповтің нұсқауынша, ұсынылған жүйе жылу карталары түріндегі ГАЖ-де динамикалық визуализацияға және қала инфрақұрылымына – iKomek, eOtinish интеграциялауға мүмкіндік береді.
Келесі технологияның артықшылығы – дірілсіз технология арқылы темірбетон бұйымдарын шығару. Оны Қ.Сатпаев атындағы Қазақ ұлттық техникалық зерттеу университетінің магистрі Ильнура Мадиярова ұсынды. Ол жаңа темір-бетон бұйымдары – жылу магистралдық науалар, суару және суару арықтары дірілсіз технология бойынша шығарылатынын айтты. Мұндай бұйымдарды пайдаланған кезде арматуралық жақтау және кіріктірілген бөліктер қозғалмайды, бетон қоспасы біртекті болады, осылайша ақауларды болдырмай, экологиялық таза және дірілдің зиянды әсерін жояды.
М.Х.Дулати атындағы Тараз өңірлік университетінің магистрі жоба авторы, инженер Ерлан Әтенов, тұрғын-үй құрылысына арналған темірбетонды қадаларды өндіру бойынша ұсынған әзірлемесінің артықшылығы ретінде олардың көтергіштігінің жоғары болуы, темірбетонды тұтынудың азаюы, қысқа қадаларды пайдаланудың қарапайымдылығы мен сәйкесінше, аз қада машиналарымен және габаритті көліктермен жұмыс істеу тиімділігін атап өтті.
Коммерцияландыру реакторына 100-ден астам ғылым мен бизнес өкілдері қатысты. Олардың қатарында сарапшылар, ғалымдар, Қазақстан құрылысшылар одағының «KZ Stroyexpert» ЖШС-нің, QazGem Қазақстандық цемент және бетон өндірушілер қауымдастығының, Қазақстан құрылыс қауымдастығының, Қазақстан автоклавты газдалған бетон өндірушілер қауымдастығының өкілдері және тағы басқа бар.
Ғалымдар мен бизнес өкілдері арасында ынтымақтастық және жобаларды бірлесіп жүзеге асыру туралы алдын ала келісімдер жасалды.