Газа секторындағы Денсаулық сақтау министрлігі соңғы тәуліктегі жағдай бойынша мәлімдеме жасады, деп хабарлайды El.kz интернет порталы.

Ресми деректерге сәйкес, соңғы 24 сағат ішінде ауруханаларға 83 адамның мәйіті жеткізіліп, 216 адам жарақат алған. 2023 жылдан бері жалғасып келе жатқан израильдік әуе және артиллериялық шабуылдар салдарынан қаза тапқандардың жалпы саны 65 502 адамға жетті. Жараланғандардың саны – 167 376.

19 қаңтарда келісілген атысты тоқтату режимін Израиль 18 наурызда бұзып, қайтадан шабуыл бастағаннан бері 12 939 палестиндік көз жұмып, 55 335 адам жараланған.

Сонымен қатар 27 мамырдан бері Израиль мен АҚШ басшылығымен құрылған гуманитарлық көмек тарату орталықтарына жасалған жүйелі шабуылдар кезінде 2 538 адам қаза тауып, 18 581 адам жараланған.

Министрлік мәліметінше, қираған ғимараттардың астында әлі де мыңдаған адамның мәйіті қалып қойған.