ФИФА президенті Джанни Инфантино 16 қазанда ресми мәлімдеме жасап, 2026 жылғы әлем чемпионатына сатылған билеттердің алғашқы нәтижелерін жариялады, деп хабарлайды El.kz интернет порталы.

Футбол ұйымының басшысы атап өткендей, қазіргі уақытта бір миллионнан астам билет өз иесін тапқан. Әлем чемпионатының алғашқы сатысындағы сатылым кезінде 200-ден астам елдің жанкүйерлері билет сатып алған.

2026 жылғы футболдан әлем чемпионаты 11 маусым мен 19 шілде аралығында АҚШ, Канада және Мексикада өтеді. Биылғы турнир тарихта алғаш рет 48 құрама команда қатысатын әлемдік дода болмақ.

Командалар 12 топқа бөлінеді, әр топта төрт командадан. Әр топтың алғашқы екі орны мен ең үздік сегіз үшінші орын иегері плей-офф кезеңіне жолдама алады.