Елімізде несие тарихында қарызды кешіктірген азаматтарға жаңа қарыз алу мүмкіндігі шектеледі. Бұл туралы Қаржы нарығын реттеу және дамыту агенттігінің (ҚНРДА) төрайымы Мадина Әбілқасымова Мәжілістегі отырыста айтты, деп хабарлайды El.kz интернет порталы.

Кім жаңа несие ала алмайды?

Әбілқасымова мәлімдегендей, қарызын 90 күн немесе одан көп мерзімге кешіктірген азаматтар енді жаңа тұтынушылық несие ала алмайды. Сонымен қатар, жаңа несие бойынша максималды сомаға да шектеу қойылған.

Төрайым бұрынғы шешімдерді еске салды:

• Тамыз айында микроқаржы ұйымдарынан бір күндік кешіктірілген төлемі бар азаматтарға жаңа несие беруге тыйым салынған.
• Кейіннен шешім кеңейіп, 30 күндік кешіктіруі бар азаматтар да жаңа несие ала алмайтын болып өзгерген.

Несие мерзімдері қысқарады

Сонымен қатар, тұтынушылық несиелердің ұзақ мерзімі шектелетін болды. Бұрын адамдар қарыз жүктемесін (КДН – кредит төлемінің жалақыға қатынасы) ескере отырып 5–7 жылға несие алатын, енді бұл мерзім максимум 5 жылға дейін қысқарады.

Автонесиелер тез өсуде

2024 жылы тұтынушылық несиелердің өсу қарқыны 33,5%, ал биыл 17,8% болды. Бұл портфельдегі автокредиттердің үлесі 25%-ға жеткен. төрайым атап өткендей, автонесие көлемі өткен жылы 50%-ға, ал биыл 35%-ға артқан.

Мадина Әбілқасымованың айтуынша, тек кепілсіз тұтынушылық несиелердің өсуі өткен жылы 29%, ал биылғы 9 айда 12,9% құраған.

КДН төмендеуі мүмкін

Бұған дейін хабарланғандай, Қазақстанда несиелік төлемнің кірісіне қатынасы коэффициенті (КДН) 30%-ға дейін төмендетілуі мүмкін. Бұл өзгеріс күшіне енсе, кірісінің 30%-нан артық кредит төлемі бар азаматтар жаңа қарыз ала алмайды.