Елордада «Қазақстан халқына» қорының бастамасымен «Білімді ұрпақ – білімді ел» атты білім беру конференциясы басталды, деп хабарлайды El.kz ақпараттық агенттігі.
Қоғамдық қор серіктестермен бірлесіп жүзеге асырып жатқан және елдің білім беру саласындағы жүйелі проблемаларды шешуге бағытталған білім беру саласындағы пилоттық жобалардың нәтижелерін көпшілікке таныстырды.
Іс-шараға ҚР премьер-министрінің орынбасары Алтай Көлгінов, оқу-ағарту министрі Ғани Бейсембаев, Ғылым және жоғары білім министрі Саясат Нұрбек, Ақпарат және қоғамдық даму министрі Дархан Қыдырәлі, Парламент депутаттары, «Қазақстан халқына» қорының Қамқоршылық кеңесінің және білім мен мәдениет мәселелері жөніндегі сарапшылық комитеттерінің мүшелері, донорлық ұйымдар, қоғамдық бірлестіктер басшылары, білім беру саласындағы қайырымдылық бағдарламалар мен жобалар іске асырылып жатқан 130 тірек және арнайы мектептердің басшылары мен оқытушылары, сарапшылар, 15 ЖОО ректоры қатысуда. Конференцияға қатысуға ниет білдірген оқушылар мен студенттер қайырымдылық жобаларының нәтижесімен, болашақ жоспарларымен бөлісті. Олар үшін арнайы ақпараттық-танымдық бағдарлама дайындалды.
Онлайн режимде 850-ге тарта қатысушы облыстар мен Астана, республикалық маңызы бар қалалар әкімдерінің орынбасарлары, облыстық басқармалардың, аудандық білім бөлімдерінің басшылары, ЖОО ректорлары мен проректорлары, тірек және арнайы мектептердің ұжымдары қатысуда.
Конференция жұмысы қор мен серіктестер жобаларының көрмесінен басталды, онда бастауыш сынып кабинеттері, технология, телестудия, СТЭМ, Арт-студия, есту қабілеті нашар балаларға арналған кабинет, логопед кабинеті, аутизмі бар балаларға арналған орталық кабинеті, сенсорлық кабинет, робототехника кабинеті инсталляциясы ұсынылды, дамытушы жабдықтар орнатылды, сондай-ақ «Тұсау кесер», «Coursera - қазақ тілінде» және «білім беру гранттары» жобаларына арналған стендтер құрылды.
«Қазақстан халқына» қоғамдық қоры серіктестермен бірлесіп бүгінгі конференция мен таныстырылған жобалардың бастамашысы болғанын атап өткім келеді. Әрине, бұл жобалар бір күнде ойдан пайда болған жоқ. Бұл жобалар - бірқатар қоғамдық ұйым мен мамандардың бастамасымен тәжірибеде өзектілігі мен қажеттілігін дәлелдеген жобалар. Біздің ойымызша, осы маңызды пилоттық жобаларды мемлекет деңгейінде кең таратуға болады. Сондықтан конференция аясында осы бастамаларды кәсіби мамандар арасында таныстырып, оны талқылап, осы бағыттағы жұмысты жалғастырмақпыз, - деп атап өтті «Қазақстан халқына» ҚҚ басқарма төрағасы Болат Жәмішев конференцияның пленарлық отырысының ашылуында.
Болат Жәмішевтің айтуынша, білім беру саласында қор 5 қайырымдылық бағдарламасын жүзеге асырады, оның ішінде «ауылдық жерлерде тірек мектептердің әлеуетін дамыту», «арнайы мектеп білім беру ұйымдарын жарақтандыру», «білім беру гранттары», «Болашақ инженерлер», «Coursera – қазақ тілінде» бар. Қор білім беру саласындағы қайырымдылық жобаларын іске асыруға 37,5 млрд теңге бағыттады.
Қор басшысы сондай-ақ ауыл мектептерінде онлайн-оқытуды жүйелі дамыту, бірқатар мектепті ерекше қажеттіліктері бар балаларға арналған баспалдақ көтергіштермен жарақтандыру бойынша пилоттық жобаны іске асыру бойынша ұсыныстарды айтты.
Пленарлық отырыста Білім беруді тұрақты дамыту қорының директоры Данияр Тоқтарбаев, «НЗМ» басқарма төрағасы Әнуар Жанғозин, «BMG Upskill» компаниясының директоры Рауан Кенжеханұлы, Абай атындағы ҚазҰПУ зерттеуші профессоры Зульфия Мовкебаева, «Арман» холдингінің президенті Серікбай Бисекеев сөз сөйледі.
«Ауыл мектептерімен әдістемелік жұмыс тұжырымдамасын Назарбаев зияткерлік мектептері 2020 жылдан бері жүргізеді. Жоба басталған уақытта 6 аймақтың 14 мектебі қамтылған болатын. Жүргізілген зерттеулердің қорытындысы бойынша бірқатар ауыл мектебіне ортақ проблемалар анықталды. Бұл сабақтарды тиімді жоспарлау және өткізу, оқушыларды бағалау үшін мұғалімдердің пәндік білімі мен әдістемелік құзыреттілігі жеткіліксіз. Ал оқу процесінде АКТ-ны жеткіліксіз пайдалану мен материалдық-техникалық базаның тапшылығы сынды мәселелер болды.