Алдағы күндері Қазақстан аумағында ауа райы құбылмалы болады. Циклон әсерінен еліміздің басым бөлігінде найзағай ойнап, жаңбыр жауады, кей өңірлерде жауын-шашын күшейіп, бұршақ түсуі мүмкін, деп хабарлайды El.kz интернет порталы «Қазгидрометке» сілтеме жасап.
Батыс, солтүстік, шығыс және орталық өңірлерде найзағайлы жауын-шашынмен қатар қатты жаңбыр мен бұршақ болжанып отыр.
Ауа температурасы өңірлер бойынша келесідей өзгермек:
Батыс Қазақстанда күндізгі температура 22–30 градустан 30–37 градусқа дейін жоғарылайды;
Солтүстік-батыста ауа 20–30 градустан 23–33 градусқа дейін көтеріледі;
Солтүстікте күн салқындап, 18–28 градус шамасында болады;
Орталық пен шығыста күн райы біршама төмендеп, 23–34 градустан 20–33 градусқа дейін түседі, кей аймақтарда бұрынғыдай 35–38 градусқа дейінгі аптап ыстық бәсеңдейді;
Оңтүстікте ауа температурасы 25–35 градустан 29–37 градусқа дейін көтеріледі;
Оңтүстік-шығыста 30–39 градусқа дейінгі аптап ыстық сақталады.
Мамандар найзағайлы сәттерде сақ болуға, ал дауыл және бұршақ кезінде ашық далада ұзақ жүрмеуге кеңес береді.