Қазақстандағы ақылы жолдар толығымен жүргізушілер төлейтін қаражат есебінен жұмыс істейді. Мемлекеттен қосымша қаржы бөлінбейді. «ҚазАвтоЖол» компаниясының айтуынша, жол үшін төленген барлық қаражат тікелей жолдарды күтіп ұстауға, жөндеуге және инфрақұрылымды жаңартуға жұмсалады. Осылайша трассалардың жағдайы жақсы деңгейде сақталып, жүргізушілердің қауіпсіздігі қамтамасыз етіледі, деп хабарлайды El.kz интернет порталы.

Ұлттық оператор республикалық және халықаралық маңыздағы ақылы учаскелерді басқарады. Түсетін қаражат бөлек есепте жиналып, тек жолдың қажеттіліктеріне ғана пайдаланылады: техника сатып алу, белгілер орнату, жарықтандыру, жөндеу жұмыстары және басқа да қызметтер.

Өткен жылы ақылы жолдардан түскен қаражат есебінен үлкен көлемде жұмыс атқарылды. Жолдар жөнделді, техникалар жаңартылды, жол бойына жаңа белгілер қойылды, қардан тазарту жұмыстары жүргізілді.

Биылғы жылы да түсім ұлғайып, ақылы учаскелердің аумағы кеңейді. Бұл қаражатқа жаңа техникалар алынып, жолдарды жөндеу және күтіп ұстау жұмыстары жалғасты. Көптеген жол белгілері жаңартылып, қоршаулар қалпына келтірілді.

«ҚазАвтоЖол» қызметіне Бас прокуратура мен Антикоррупция қызметі сияқты органдар тұрақты түрде бақылау жасайды. Барлық қаржылық есептер аудиттен өтіп, ашық қолжетімді болады. Бұл компания жұмысының ашықтығын күшейтіп, халықтың сенімін арттырады.

Ақылы жолдар еліміздің көлік жүйесін дамытуда маңызды рөл атқарады. Олар логистиканы жақсартып, жолдағы қауіпсіздікті арттырады, бюджетке түсетін салмақты азайтады және тартылған қаражатты қайтадан инфрақұрылымды жақсартуға бағыттайды.