Электромобильдер нарығында жаңалық көп. Жақында Jaguar компаниясы өзінің тарихындағы ең қуатты әрі ерекше электромобилін таныстырды, деп хабарлайды El.kz интернет порталы.

Бұл – төрт есікті EV GT спорт-седан моделі. Көлік бір зарядпен 430 мильге дейін (шамамен 690 км) жүре алады және жылдамдығымен ерекшеленетін жаңа үлгі

Jaguar бренді бұл үлгіні өз болашағының негізі ретінде қарастырып отыр. Жаңа электромобиль 2025 жылдың соңына қарай өндіріс желісіне шығуы мүмкін. Бұл модель тек дизайны мен техникалық сипаттамасымен ғана емес, қолдану тәжірибесі мен жетілдірілген технологиясымен де ерекшеленеді.

Көлік компаниясының мәліметінше, EV GT үлгісі Jaguar-дың жаңа электр платформасында жасалған. Ол тек экологиялық таза қозғалысты ғана емес, сонымен қатар жоғары жылдамдық пен динамиканы қамтамасыз етеді. Жаңа жүйе батареяны тез қуаттау мүмкіндігін арттырып, жүргізушіге заманауи технологияларды ыңғайлы пайдалануға жол ашады.

Айта кетейік, бұл жаңалық Hyundai Ioniq 6 N, Xiaomi SU7, Lucid Gravity X сынды өзге де соңғы үлгідегі электромобильдер қатарында айрықша бағалануда. Әсіресе, Ioniq 6 N жоғары жылдамдық пен спорттық сипаттамаларымен ерекшеленсе, Xiaomi SU7 — қолжетімді баға мен 800 км-ге дейінгі жүріс ауқымымен көзге түсті.

Электромобиль индустриясындағы бәсекелестік күннен күнге күшейіп келеді. Әрбір жаңа модель экологияны сақтау, тиімді қуат тұтыну және жүргізушіге максималды жайлылық ұсыну бағытында жасалып отыр. Jaguar-дың EV GT моделі – соның жарқын дәлелі.