Бұл шығарылымда әрқайсымыздың шкаф түкпірінде жатқан – ескі, кимейтін, тозығы жеткен киімдер жайлы сөз қозғаймыз. Жыл сайын әлемде миллиондаған тонна киім қоқысқа тасталып, экологияға орасан зиян келтіреді. Ал шын мәнінде ескі киім – қоқыс емес, екінші өмірге лайық ресурс. Қайта қолдануға жарамды киімдер – мұқтаж жандарға көмек, ал жарамсыз киімдер – тұрмыстық шүберек, изоляциялық материал немесе қайта өңделген шикізат көзі бола алады. Әлемнің дамыған елдерінде киім жинау мәдениеті қалыптасқан: арнайы контейнерлер орнатылып, сұрыптау, тарату, өңдеу процестері жүйеленген.