20 Желтоқсан 2012, 09:44
- 1997 жылы дағдарыс кезінде «Қазақстан - 2030» бағдарламасы қабылданған кезде ешкім сенген жоқ еді. Президент Нұрсұлтан Назарбаевтың жанқиярлық еңбегінің нәтижесінде сол жүзеге асты ғой. Қазіргі қоғам арман мен қиялға балаған жоспарлардың 15 жыл өткен соң орындалғанын көріп тұр. Қазір әлемдегі ең мықты мемлекеттер осы ғасырдың бірінші жартысына дейінгі даму бағдарламаларын жасап жатыр. Сондықтан да Елбасы атап отырған 2050 жылға дейінгі стратегия кездейсоқ дүниеге келген жоқ. Тәуелсіздіктің 21 жылында жаңа тұрпатты Қазақстан қалыптасты, енді жас буын тұрақтылық пен татулықты мәңгілікке сақтап қалудың жолдарын іздеу керек. Стратегия соның негізгі темірқазығы болары даусыз.
Елбасы мемлекеттік басқару органдарына заман көші мен дамуына сай әрекет етуді үнемі талап етіп келеді. Екі жыл бұрын аймақтарға бөлінген қаржыны қадағалайтын тексеру комиссиясы құрылды. Түрлі тексерістер нәтижесінде заңсыз жаратылған 40 миллиард теңге кері қайтарылып, заңсыздыққа жол берген мыңнан астам лауазым иесі жазаланды. Дегенмен соңғы кездері аңғарылғаны бақылаудың барлығын билік тетіктері арқылы жүргізу қиынға соғатынын көрсетіп жүр. Сондықтан да ауыл әкімдерін сайлау арқылы бекітуді бастағалы отыр. 2533 ауыл әкімі мен 50 аудан-қала басшыларын жергілікті тұрғындардың тікелей араласуымен қызметке қою, өңірлердегі талай мәселенің орталықтардағы кабинеттерде емес, сол жердің өзінде шешуге зор мүмкіндіктер туғызады. Билік жүйесін халықтың таңдауымен байланыстыру, бөлінген қаржылар мен берілген тапсырмалардың қаншалықты орындалғанын айқын көрсетеді. Тұрғындар ол істердің бел ортасында жүріп, сыбайластықтың орнамауына, бюджет қаржысының талан-таражға түспеуіне тікелей араласып, тәртіпке шақыра алады. Мұны Президенттің қоғамды демократияландыру жолындағы кезекті әрі маңызды қадамы деп қабылдаған жөн.
Айқын газеті