Елбасы қазақстандықтарды Тәуелсіздік күнімен құттықтады

Бүгін Астанада ҚР Тәуелсіздігінің 21 жылдығына орай өткен салтанатты жиын барысында ел Президенті Нұрсұлтан Назарбаев қазақстандықтарды Тәуелсіздік күнімен құттықтады, деп хабарлайды BNews.kz тілшісі. «Баршаларымыздың ең киелі құндылығымыз - Тәуелсіздігіміздің туған күнімен құттықтаймын! Бүгін өзіңіз көріп отырғандай, Астанамызда қазақ мәдениетінің ең биік теңдесі жоқ өнер ордасы – «Астана Опера» Мемлекеттік опера және балет театрында тұңғыш рет кездесіп отырмыз. Осынау ғажайып мәдениет ордасы баршамызға құтты болсын!», - деді Н.Назарбаев.

Естеріңізге сала кетейік, бүгін, 14 желтоқсанда сағат 15:00-де Мемлекет басшысы Нұрсұлтан Назарбаев «Астана опера» МОБТ-дағы Қазақстан Республикасы Тәуелсіздігінің 21 жылдығына арналған салтанатты жиынды ашты.

Шара барысында Елбасы Қазақстан - 2030 стратегиясының іске асырылуын қорытындылап, халыққа елдің 2050 жылға дейінгі дамуының жаңа басымдықтарын таныстырады.

Содан кейін Қазақстан Республикасы Тәуелсіздігінің 21 жылдығына арналған мерекелік концерт өтеді.