1 Шілде 2013, 05:38
Қазақстан Республикасы Тұңғыш Президентінің Мұражайы өзінің танымдық қызметінде балалардың жан-жақты дамуына бағытталған жұмыстар атқарып келеді. Осындай ең негізгі сәттердің бірі балдырғандарды еліміздің және басқа да мемлекеттердің мәдени дамуымен, өркениетімен, салт-дәстүрімен, таныстырып, олардың бойында әлемдегі түрлі мәдениетке деген құрмет сезімдерін қалыптастыру, төзімділікті тәрбиелеу болып табылады.
Қаланың мектепке дейінгі мекемелерімен бірге атқарып келе жатқан бұрыннан қалыптасқан ізгі іс-шаралар Мұражай мен Астана қаласы Білім басқармасының ынтымақтастығының жемісі деп толық айтуға болады. Баршаға мәлім, мектепке дейінгі кезең сәби бойындағы ерекше қабілеттің көрінетін, сол арқылы барлық жақсы қасиеттердің қалыптасатын уақыты. Бүлдіршін осылай төңірегін танып-білу арқылы бойына отансүйгіштікті, өзіне жақын адамдарға, балабақшасына, туған қаласына, Отанына деген балалық сезіміді сіңіреді. Ал бұл оның азамат болып жетілуі үшін аса қажет.
Балалар мерекесі қалалық №11 «Гауһар» ясли-бақшасының ұжымымен бірге әзірленді.
Мереке бағдарламасына қазақ халқының аңыз-ертегілері, «Көпұлтты Қазақстан» би отшашауы, Астана, достық пен балалық туралы әндер мен жырлар енгізілген. Мерекелік іс-шараның қорытындысында осы тамаша мерекені ұйымдастырушылар тарапынан сәбилерге тосынсыйлар жасалып, ескерткіш сыйлықтар тапсыру жоспарланған.