Google өзінің Chrome браузеріне жасанды интеллект негізіндегі ірі жаңартуды жариялады. Енді браузерге Gemini атты ІІ-чатбот интеграцияланып, ол пайдаланушының іздеу тарихын талдап, интеллектуалды агент рөлінде түрлі тапсырмаларды орындай алады, деп хабарлайды El.kz интернет порталы.

Wired мәліметінше, Gemini функциялары алдымен АҚШ-та Mac пен Windows қолданушыларына ағылшын тілінде қолжетімді болады. Чатботқа қол жеткізу оң жақ жоғарғы бұрыштағы арнайы белгіше арқылы жүзеге асады, қажет болған жағдайда оны жасыруға да болады.

Gemini көмегімен пайдаланушылар ашық тұрған беттің мазмұнын түсіндіріп беруін сұрай алады немесе бірнеше қойыншадан ақпаратты біріктіріп, қысқаша мазмұндап алуға мүмкіндік бар. Бұл әсіресе саяхат жоспарлау немесе түрлі сайттардан деректер жинау кезінде өте ыңғайлы.

Жақын арада Chrome-да чатбот арқылы тарих бойынша іздеу мүмкіндігі пайда болады. Әдеттегі шолу тізімін қараудың орнына пайдаланушы «Өткен аптада қай сайттан грек жаңғағынан жасалған үстелді көрдім?» деген секілді сұрақ қоя алады, ал Gemini оған сәйкес сілтемелерді тауып береді.

Бұған қоса, Google алдағы айларда ІІ-агентті кеңейтіп, ол пайдаланушының тапсырмаларын өз атынан орындайтын болады. Мәселен, шаштаразға жазылу немесе азық-түлікке тапсырыс беру сияқты шаруаларды чатботқа айту жеткілікті — әрі қарай ол барлық әрекетті өзі жүзеге асырады.

Chrome браузерінде жаңа AI Mode режимі іске қосылады, ол арқылы ақпарат іздеуді бірден мекенжай жолағынан бастауға болады. Компания бұл мүмкіндікті 2025 жылдың қыркүйек айының соңында АҚШ-та ағылшын тілінде іске қосып, кейін басқа аймақтар мен тілдерге кеңейтуді жоспарлап отыр.

Сонымен қатар, Google ІІ технологияларын парольдерді басқаруға да енгізбек. Қолданушылар скомпрометацияланған сақталған құпиясөздерін бір ғана батырмамен ауыстыра алады.