Қазіргі заманда ұялы телефон баланың күнделікті өмірінің ажырамас бөлігіне айналды. Ата-аналар кейде тыныштық үшін немесе бала зерікпесін деп, гаджетті қолына ұстата салады. Алайда бұл әрекет уақыт өте келе баланың назарын, ойлау қабілетін және мінез-құлқын өзгертеді. Сондықтан баланы телефонға тәуелді етпей өсіру - бүгінгі ата-ананың басты міндеттерінің бірі, деп жазады El.kz интернет порталы.

Ең алдымен, ата-ана өз үлгісімен тәрбиелеуі керек. Егер үлкендер үнемі телефонға үңіліп отырса, бала да соны қалыпты әрекет деп қабылдайды. Сол себепті үйде белгілі бір уақыт аралығында «гаджетсіз сағат» енгізу пайдалы. Бұл уақытта отбасы мүшелері бірге әңгімелесіп, үстел ойынын ойнап, серуенге шығуы қажет.

Екінші маңызды қадам - балаға телефонды шектеулі уақытта ғана қолдануға рұқсат беру. Мысалы, күніне 1-1,5 сағаттан артық емес. Телефонды оқу, шығармашылық немесе пайдалы ақпарат іздеу мақсатында қолдануға үйрету керек. Ал ойын мен әлеуметтік желілерге кеткен уақытты азайтуға назар аударған жөн.

Үшіншіден, баланың бос уақытын тиімді ұйымдастыру қажет. Егер оның өмірінде спорт, музыка, сурет салу немесе кітап оқу секілді қызығушылықтары болса, телефонға тәуелділік өздігінен азаяды. Мұндай хоббилер баланың ой-өрісін кеңейтіп, өзін-өзі дамытудың жолын ашады.

Тағы бір маңызды нәрсе - ашық әңгіме. Ата-ана баламен ұялы телефонның пайдасы мен зияны туралы жиі сөйлесіп отырғаны дұрыс. Неге шектеу қойылып жатқанын бала түсінуі керек, әйтпесе ол тыйымды қысым деп қабылдайды. Сенімді қарым-қатынас арқылы ғана балада жауапкершілік сезімі қалыптасады.

Қорытындылай келе, баланы ұялы телефонға тәуелді етпеу үшін бастысы – отбасы ішіндегі жылы қарым-қатынас пен ата-ананың үлгісі. Уақытты бірге өткізу, баланың қызығушылығын қолдау және гаджет қолданудың мәдениетін қалыптастыру - тәрбиенің ең тиімді жолы.