Ол өз сауалын ҚР жасанды интеллект және цифрлық даму вице-министрі Дмитрий Мунға сұрақ қойды.
Асхат Аймағамбетовтың айтуынша, қазіргі таңда Қазақстанда балалар TikTok немесе Instagram секілді әлеуметтік желілерге ата-анасының келісімінсіз және ешқандай жас верификациясынсыз тіркеле алады.
Бала 5-6 жастан бастап кез келген контентке толық қол жеткізе алады. Ал көптеген елдерде бұл заңмен шектелген. Мысалы, Дания мен Австралияда тіркелу жасы 15-16, ал АҚШ, Ұлыбритания және Ирландияда тек ата-анасының расталған келісімімен ғана тіркелуге болады, – деді депутат.
Осыған байланысты ол Цифрлық даму және Оқу-ағарту министрліктерінің бұл мәселеге қатысты нақты ұстанымы бар-жоғын сұрады.
Вице-министр Дмитрий Мун бұл бағытта жұмыс жүргізіліп жатқанын атап өтті. Оның айтуынша, цифрлық кодекс аясында бірыңғай талаптар мен стандарттар енгізу қарастырылған.
Қазір әлемде түрлі форматтағы шектеулер енгізілуде, бұл – балаларды белгілі бір контенттен қорғауға бағытталған шаралар. Бірақ сонымен қатар олардың цифрлық дамудан шет қалмауын да қамтамасыз ету қажет, – деді ол.
Депутаттың екінші сұрағы мектептерде смартфон қолдануға қатысты болды. Ол Англия, Нидерланд және әлем елдерінің шамамен 40%-ында мектептерде смартфон қолдануға ресми тыйым салынғанын атап өтті.
Қазақстандағы кейбір жетекші мектептер – NIS, БИЛ, «Дарын» желісі сабақ кезінде смартфон қолдануға шектеу қойды, нәтижесінде оқушылар белсендірек болып, бір-бірімен жиі сөйлеседі, сабақта алаңдау азайды. Бірақ көптеген мектептерде жағдай басқаша, мұғалімдер қақтығыстан қорқады, ал балалар сабақ пен үзіліс кезінде TikTok-та сағаттап отырады, – деді Аймағамбетов.
Бұл мәселеге қатысты Дмитрий Мун министрліктің ұстанымын былай түсіндірді.
Қазіргі таңда цифрлық кодексте мектептерде смартфон қолдануға тыйым салу қарастырылмаған. Біздің позиция — балаларды жаңа технологияларды дұрыс әрі жауапкершілікпен пайдалануға үйрету. Біз оларды цифрлық сауатты, заманауи қоғамға бейім ұрпақ ретінде тәрбиелеуіміз қажет, – деді ол.
Вице-министрдің айтуынша, бұл бағыттағы жұмыс жалғасады және алдағы уақытта цифрлық кодекс аясында нақты тетіктер қарастырылуы мүмкін.